Qoshanov Oktıabr aýdanyna Álıhan Bókeıhannyń esimin berýge qatysty oıyn bildirdi
«Oktıabr aýdany jóninde bizde jıi másele kóteriledi. Shynynda da, meniń óz oıym - Oktıabr aýdanynyń ataýy ózgergeni durys. Bizdiń Qaraǵandyda Lenın degen de kóshe bar áli. Endi onyń ýaqyty kelip te qalǵan shyǵar. (...) Álıhan Nurmuhameduly Qaraǵandy oblysynyń ǵana emes, qazaqtyń úlken qaıratkeri. Ol kisiniń eńbegin de, ulylyǵyn da biz moıyndaımyz. Siz aıtqan másele meniń aldymdaǵy ákimniń kezinde de qaralǵan bolatyn. Qazir de bul másele bizdiń qaraýymyzda», - deıdi oblys ákimi.
Erlan Qoshanov óz sózinde aýdan ataýyn ózgertýdiń óz tártipteri men rásimderi bar ekenin atap ótti.
«Bul oblys ákimi kelip aýystyra salatyn másele emes. Oktıabr aýdany degen ol respýblıkadaǵy eń iri aýdandardyń biri. 260 myńdaı adam turady. Mine, sondyqtan da, bul zertteýdi, zerdeleýdi qajet etedi. Men ákim bolyp kelgen kezde bári daıyn tursa qazir onyń ataýyn aýystyryp ta jiberýge bolatyn edi. Biraq, bunyń bárin biz zerttep, qoǵamdyq tyńdaý ótkizip, tıisti sheshim shyǵarýymyz kerek. Onyń barlyǵyn osy jerde shynyn aıtqanda, ashyp aıta almaımyn», - deıdi Erlan Qoshanov.
Sonymen qatar, aımaq basshysy bul baǵytta jumys toqtamaıtynyn jetkizdi.
«Kishkene ǵana sheginis jasasam... Maǵan osy suraqty 100 kún ótken kezde (óńirge ákim bolyp kelgenine 100 kún bolǵanda - avt) de qoıyp edi. Men sonda da aıtyp edim. Sábıt Muqanovtyń kitabyn bala kezde oqyǵanmyn. Esimde qalyp qoıyp edi. Maǵjan Jumabaevty, Álıhan Bókeıhanov sekildi tulǵalardyń attaryn ataýǵa da bolmaıtyn. Sol kitapta men bilemin, bizdiń uly klassıgimizdiń ózi Maǵjan Jumabaevty, osylardy «baıdyń quıyrshyǵy», «halyq jaýy» retinde sanamyzǵa sińirip tastaǵan ǵoı. Biraq, Táýelsizdik alǵannan keıin, Elbasynyń qoldaýynyń arqasynda qazir onyń barlyǵyn ashyq aıtyp jatyrmyz. Álıhan Bókeıhannyń atynda qanshama kóshe bar. Eskertkish ashylyp jatyr. Biz ózimizdiń ardaqtylarymyzdy qadirlep, ulyqtap jatyrmyz. «Rýhanı jańǵyrý» baǵdarlamasynyń ózinde tegińdi bilý, kodyńdy bilý degenge shaqyrady ǵoı. Biz durys kele jatyrmyz. Bul baǵytta jumys jasalady», - dep túıdi ol.
