Qoshanov Májilistiń jumysy týrasynda: Joldaýdaǵy bastamalardy jedel zańnamalyq turǵyda qamtamasyz etý kerek

ASTANA. KAZINFORM — Parlament Májilisiniń tóraǵasy Erlan Qoshanov Jolaýdaǵy basty mindetterge qatysty pikir aıtty. 

— Memleket basshysynyń arnaıy nazar aýdaryp, jumysymyzǵa joǵary baǵa berýi zań shyǵarý isinde qarqynymyzdy odan ary arttyrýǵa qulshyndyra túsedi dep oılaımyn. Bárińiz Joldaýmen egjeı-tegjeıli tanysyp, odan alǵan áserlerińizdi, túıgen oılaryńyzdy aıtyp, buqaralyq aqparat quraldarynda, áleýmettik jelilerde bólisip jatsyzdar. Árqaısyńyz ózińizge jaqyn tusyn taýyp, jumys baǵyttaryńyzdy anyqtap aldyńyzdar dep bilemin. Bıylǵy Joldaýdyń salmaǵy da, aýqymy da bólek boldy.

Prezıdent mańyzdy bastamalar kóterdi. Aldaǵy jumystyń aıasyn aıqyndap, naqty merzimin belgilep berdi. Bizdiń endigi mindetimiz — Úkimetpen, azamattyq qoǵammen birge tyǵyz áreket ete otyryp, Joldaýdaǵy barlyq bastamany jedel túrde zańnamalyq turǵyda qamtamasyz etý, — dedi Erlan Qoshanov Májilistiń jalpy otyrysynda. 

Osy oraıda Májilis tóraǵasy jappaı tsıfrlandyrý men barlyq salada jasandy ıntellektini qoldaný ıdeıasy osy jolǵy Joldaýdyń ózegine aınalǵanyn atap ótti.

Prezıdent strategııalyq maqsat qoıyp otyr. Ol — Qazaqstandy úsh jyl ishinde tsıfrlyq memleketke aınaldyrý. Bul turǵyda salany retteý úshin naqty zańnamalyq tetikter qajet. Bul rette, Tsıfrlyq kodeks pen Jasandy ıntellekt týraly zań erekshe ról atqarýǵa tıis. Qazir olar boıynsha jumys júrgizilip jatyr.

— Atalǵan zańdardy jyl sońyna deıin qabyldaýymyz kerek. Beıindi komıtet osy jumysty júıeli uıymdastyrsyn. Ekinshiden, jyldam ózgerip jatqan tehnologııalar men jańa ekonomıkalyq jaǵdaıda Memleket basshysy aldymyzǵa bankter týraly zańnamany jańartý mindetin qoıdy. Búgin biz bankter jáne banktik qyzmet týraly zań jobasyn talqylaýǵa alamyz. Qoldanystaǵy zańǵa otyz jyl toldy. Sondyqtan ol jańartýdy qajet etip otyr.

Jańa zań qarjy sektoryn ıkemdi ári ınnovatsııalarǵa ashyq ete túsýi kerek. Fınteh-kompanııalardy qoldaýmen qatar, qarapaıym azamattardyń múddesin qamtamasyz etýge de jol ashady. Jumys toby barlyq múddeli taraptardyń pikirin tyńdap, jan-jaqty talqylaǵany jón. Jalpy, bul zańdy da jyl sońyna deıin qabyldaýǵa tıispiz, — dedi ol.

Sonymen qatar Erlan Qoshanov tsıfrlyq damý qarqyn alyp otyrǵan qazirgi kezeńde kıberqaýipsizdik máselesine de aıryqsha nazar aýdarý kerek ekenin aıtty. Bul másele osyǵan deıin de depýtattar tarapynan talaı ret kóterilgen bolatyn. Osy rette depýtattar jańa zańnamalyq usynystar daıyndaıdy.

— Jer máselelerin retke keltirý boıynsha «Jer amanaty» komıssııasy úlken jumys atqaryp jatyr. Oǵan bizdiń depýtattarymyz da belsene atsalysyp júr. Jalpy kólemi 13,5 mıllıon gektar aýyl sharýashylyǵy jeri memleketke qaıtaryldy. Prezıdent aıtqandaı, sol jerler turalap bos qalmaı, turaqty aınalymǵa engizilip, el ıgiligine qyzmet etýge tıis… Depýtattar Úkimetpen birge aýyl sharýashylyǵy jerlerin elektrondy konkýrs arqyly bólý tetigi boıynsha zańnamalyq ózgertýler ázirleýi qajet ekeni aıtyldy. Bul barlyq protsesti rettep, ashyqtyqty qamtamasyz etedi. Endi depýtattar jerdi úlestirý úderisin de qadaǵalaýǵa atsalysatyn bolady, — dedi Májilis tóraǵasy.

Aıta keteıik, 8 qyrkúıekte Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn jarııalady.