Qoshanov: Májilis – mınıstrlerdiń mańdaıynan sıpaıtyn jer emes
ASTANA. KAZINFORM – Parlament Májilisiniń tóraǵasy Erlan Qoshanov depýtattardyń sheneýnikterge dóreki sóılep, emotsııaǵa berilýi týraly tilshiler suraǵyna jaýap berdi jáne Úkimet ókilderiniń zań jobasyn talqylaýǵa tolyq daıyndyqpen kelýi keregin aıtty.
«Májilis otyrysynda depýtattar tarapynan sheneýnikterge dóreki sóılep, jeke basqa ótip jatatyn áreketterdi baıqaımyz. Qoǵamda depýtattardyń haıp qýǵan áreketteri baıqalady degen pikirler qalyptasa bastady. Bul depýtat etıkasyna jat pa, álde depýtattardyń mınıstrlerdi qýyrdaqsha qýyrýy qajet pe?», - dep suraq qoıdy tilshiler Májilis kýlýarynda.
Óz jaýabynda Erlan Qoshanov bul barlyq álemdegi parlamentterge tán oqıǵalar ekenin atap ótti.
«Májilis – mınıstrlerdiń nemese basqa da laýazymdy tulǵalardyń mańdaıynan sıpaıtyn jer emes. Bul jerge kelgende depýtattar suraq qoıady, suraǵyna naqty jaýap ala almasa, keıde emotsııaǵa berilip te jatady. Bul barlyq álemdegi parlamentterge tán oqıǵalar, Parlamentarızmniń óziniń bir zańdylyǵy deýge bolady. Emotsııalar bolady. Biraq bul emotsııa dórekilikke, jeke basqa ótý, agressııaǵa ótý, tili men dini, ulty boıynsha kemsitýge jol berýge bolmaıdy. Ony qadaǵalaıtyn Májilis tóraǵasy retinde men barmyn jáne etıka jónindegi komıssııamyz bar», - dedi Erlan Qoshanov.
Sonymen birge spıker keıbir mınıstrler nemese orynbasarlary tolyq jaýap bere almaıtynyn nemese jazbasha jaýap joldaımyz dep qutylatynyn da aıtty.
«Olar da daıyndyqpen kelýi kerek qoı. Otyrysqa keletin Úkimet múshesi zań joabsyn tolyq bilýi kerek, qoıylatyn suraqtarǵa jaýabyn berýi kerek, sonda syndarly áńgime bolady. Al búgingi kúnge deıin jaǵa jyrtysqan, shekten shyqqan oqıǵalar boldy dep oılamaımyn», - dedi Májilis tóraǵasy.
