Qoshanov: Kitap barlyq ulttyń rýhanı qundylyǵyna aınalýǵa tıis
Astana, 23 sáýir. Májilis tóraǵasy Erlan Qoshanov Ulttyq kitap kúni aıasynda ótken «Ulttyq kitap» baıqaýy jeńimpazdaryn saltanatty marapattaý rásimine qatysty.
Ulttyq kitap kúni Qazaqstanda bıyl alǵash ret ótkizilip jatyr. Memleket basshysy Qasym-Jomart Toqaev Atyraýda ótken Ulttyq quryltaı otyrysynda bilimge qushtarlyqty, oqýǵa degen súıispenshilikti bildiretin merekeni belgileýdi tapsyrǵan bolatyn. Osyǵan oraı «Ulttyq kitap» ulttyq baıqaýy uıymdastyrylyp, onda otandyq jazýshylar, kitap shyǵarýshylar, ıllıýstratorlar men aýdarmashylar jeńimpaz atandy.
Erlan Qoshanov eń aldymen jaqynda ǵana dúnıeden ozǵan kórnekti qazaq jazýshysy, ádebıet maıtalmany Ákim Tarazıdy eske alyp, kóńil aıtty.
Odan ári saltanatty is-sharanyń mán-mańyzyna toqtalyp, qazirgi zamanda aqparat kózderiniń kóptigine qaramastan, kitaptyń orny erekshe ekenin atap ótti.
– San ǵasyrlar ótse de, kitaptyń adamzat úshin mańyzy ózgergen joq. Búginde kitap – zııatker ult pen sanaly qoǵam qalyptastyrýdyń negizgi quralyna aınaldy. Qazirgi tańda qoldanyp júrgen barlyq tehnologııa, medıtsına, óner bári de kitap oqý arqyly damyǵan. Sondyqtan Memleket basshysy aıtqandaı, kitap ulttyń rýhanı qundylyǵyna aınalýy tıis. Ulttyq kitap kúnin atap ótýdiń basty maqsaty – osy, – dedi Májilis spıkeri.
Erlan Qoshanov óz sózinde otandyq kitap shyǵarý salasyndaǵy ózekti máselelerge de toqtaldy. Atap aıtqanda, syrtqy naryqqa táýeldilik, qazaq tilindegi ádebıettiń úlesi az bolýy jáne basqa da túıtkildi jaıttarǵa nazar aýdardy.
– Prezıdent Ulttyq quryltaıda ıdeologııa salasyndaǵy basty baǵyttardyń biri – kitap shyǵarý ekenin basa aıtty. Qazirgi tańda memleket bul baǵytqa erekshe kóńil bólip otyr. Mysaly, Parlamentte qyzý talqylanyp jatqan jańa Salyq kodeksi jobasynda depýtattar otandyq kitap baspalaryn qosylǵan qun salyǵynan bosatý jóninde usynys engizdi. Bul máselede Úkimetpen ortaq sheshimge kelemiz dep úmittenemiz, – dedi Májilis tóraǵasy.
Sonymen qatar Memleket basshysynyń qoldaýymen elimizde kitaphanalar júıesi jańǵyrtylyp jatqany, kitaphanashylardyń jalaqysy kóterilip, tsıfrlyq kitaphanalar damyp jatqany aıtyldy. Bul óz nátıjesin berýde. Búginde respýblıkada shamamen 4 myń kitaphana jumys isteıdi, olardyń turaqty paıdalanýshylary 5 mıllıonnan asa adam, onyń besten biri – balalar.
«AMANAT» partııasynyń jetekshisi retinde Erlan Qoshanov «KITAP – AMANAT» partııalyq jobasynyń mańyzdylyǵyna da toqtaldy. Bul joba otandyq kitaptardy keńinen nasıhattaýdy kózdeıdi. Qazirgi tańda bul joba aıasynda elimizdiń barlyq óńirindegi partııa fılıaldary janynan 24 ortalyq ashylǵan. Onda kitap kórmeleri, avtorlarmen kezdesýler jáne ózge de is-sharalar uıymdastyrylady.
Saltanatty rásim sońynda Májilis spıkeri ulttyq baıqaýdyń bas júldesi – «Jyl kitaby» gran-prıin tabystady. «Ulttyq kitap» ulttyq baıqaýynda «Qazaqstannyń tarıhı tulǵalary» serııasy úshin «Almaty kitap» baspasynyń prezıdenti Gaýhar Saımasaeva marapatqa ıe boldy.
Ulttyq baıqaý 10 nomınatsııa boıynsha ótkizildi: «Balalarǵa arnalǵan úzdik kitap», «Úzdik komıks», «Non-fıkshn janryndaǵy úzdik kitap», «Detektıv janryndaǵy úzdik kitap», «Satıra janryndaǵy úzdik kitap», «Illıýstratsııalanǵan úzdik kitap», «Aýdarmadaǵy úzdik kitap», «Fantastıka janryndaǵy úzdik kitap», «Úzdik baspa úıi» jáne «Jyl kitaby» gran-prıi.
Marapattaý rásimine Mádenıet jáne aqparat mınıstri Aıda Balaeva, mádenıet qaıratkerleri, qoǵam belsendileri, Parlament depýtattary qatysty.
Aıta keteıik, Bakýde Muhtar Áýezovtiń «Abaı» romanynyń latyn qarpindegi jańa basylymy tanystyryldy.