Qoshanov: Qoǵamdyq keńesterdiń usynymdaryn qaraý boıynsha jaýapkershilikti kúsheıtý qajet
ASTANA. KAZINFORM — Qazaqstan Halyq Keńesiniń Tóraǵasy Erlan Qoshanov elimizdiń qoǵamdyq keńesteriniń ókilderimen kezdesý ótkizdi. Kún tártibinde Memleket basshysynyń ınstıtýttardyń ókilettikterin keńeıtý jónindegi tapsyrmalaryn iske asyrý jáne ózara is-árekettiń negizgi baǵyttary boıynsha birlesken qadamdar ázirleý máseleleri qaraldy.
Memleket basshysynyń tapsyrmalary aıasynda Halyq Keńesiniń músheleri óńirlik Qoǵamdyq keńestermen tyǵyz baılanystyń mańyzdylyǵyn atap ótti. Konstıtýtsııalyq zańǵa sáıkes Halyq Keńesiniń qyzmeti jergilikti deńgeıdegi qoǵamdyq keńester arqyly qamtamasyz etiledi. Mundaı seriktestik birden birneshe salada belsendi jumys isteýge baǵyttalǵan.
«Memleket basshysy óńirlermen qoǵamdyq keńester arqyly berik baılanys ornatý mindetin qoıdy. Bul bizge jańa múmkindikterge jol ashady. Ár adamnyń pikiri eskerilip, ár azamat eldik máselelerdi talqylaýǵa óz úlesin qosa alady. Bizdiń basty mindetimiz – halyqtyń únine der kezinde qulaq asyp, talap-tilegin tyńdaı bilý. Aldaǵy ýaqytta osyndaı basqosýlardy turaqty túrde ótkizemiz. Ortaq maqsatqa qol jetkizý úshin ózderińizben birlesip jumys atqaratyn bolamyz», – dedi Erlan Qoshanov.
Qoǵamdyq saraptamanyń áleýetine – elimizdiń túkpir-túkpirindegi 228 keńes pen 3,5 myńǵa jýyq qatysýshynyń tájirıbesine súıene otyryp, Qazaqstan Halyq Keńesiniń mindeti – óńirlerden kelip túsetin san alýan usynystar men máselelerdi jalpyulttyq kún tártibine biriktirip, naqty sheshimder ázirleý. Osy maqsatta beıindi komıtetke Hatshylyqpen birlesip, derekterdi turaqty túrde jınaý tetigin jolǵa qoıý tapsyryldy. Júıeli problemalardyń biryńǵaı kartasyn jasaý óńirlik syn-qaterlerdi naqty kórýge jáne qandaı máseleler boıynsha jumys tájirıbesin ózgertý, Úkimet sheshimderin qabyldaý nemese zańdarǵa túzetýler engizý qajet ekenin jedel aıqyndaýǵa múmkindik beredi.
2015 jyly qabyldanǵan qoldanystaǵy «Qoǵamdyq keńester» týraly zańǵa keshendi túgendeý júrgizý qajettigin aıta otyryp, Halyq Keńesiniń Tóraǵasy onyń normalaryn Halyq Keńesi týraly Konstıtýtsııalyq zańmen baılanystyrý úshin beıindi komıtet janynan arnaıy jumys tobyn qurýdy tapsyrdy.
Sonymen qatar, sheshimder qabyldanǵanǵa deıin mindetti qoǵamdyq saraptama júrgizý men yqtımal táýekelderdi baǵalaýdy kózdeıtin «nóldik oqylym» tetigine erekshe nazar aýdaryldy. Ásirese, memlekettik baǵdarlamalar men normatıvtik aktilerdi ázirleý kezinde bul tásildi qoldaný mańyzdy ekeni atap ótildi. Qoǵamdyq keńesterdiń aldyndaǵy naqty jaýapkershilikti arttyrý maqsatymen memlekettik organdardyń basshylaryna olardyń usynymdarynyń oryndalýy boıynsha keńester aldynda jeke esep berý mindetin zańnamalyq turǵydan bekitý usynyldy. Sondaı-aq óńirlerdegi úzdik tájirıbelerdi keńinen taratý jáne ortaq máselelerdi birlesip sheshý úshin qoǵamdyq keńester arasyndaǵy kóldeneń yntymaqtastyqty damytý mańyzdy mindetter retinde aıqyndaldy. Budan bólek, óńirlerdegi naqty ahýaldy kórsetetin ári jalpyulttyq kún tártibin qalyptastyrýǵa senimdi negiz bolatyn jyl saıynǵy taldamalyq «Qoǵam baıandamasyn» ázirleý usynyldy.
Otyrys barysynda Almaty qalasy Qoǵamdyq keńesiniń tóraǵasy Nurjan Jaqypov ta bastamalardy derbes súıemeldeý ıdeıasyn ortaǵa saldy. Onyń aıtýynsha, qoǵamdyq bastamalarmen jumys «irikteý júıesi» qaǵıdaty boıynsha uıymdastyrylady: ár kezeńde olardyń sapasy artyp, Halyq Keńesiniń standarttaryna sáıkestigin qamtamasyz etý úshin quqyqtyq turǵydan pysyqtalady. Osy maqsatta árbir bastamaǵa Halyq Keńesiniń bir múshesin bekitý josparlanyp otyr.
Sonymen qatar, Qazaqstan Halyq Keńesiniń múshesi Nurtaı Sabılıanov qoǵamdyq keńesterdiń qyzmetin jetildirý jónindegi óz paıymymen bólisti. Olardyń biri – qoǵamdyq keńesterdi qalyptastyrýdyń biryńǵaı ári ashyq standarttaryn zańnamalyq deńgeıde bekitý. Mańǵystaý oblysy Qoǵamdyq keńesiniń tóraǵasy Bekmurat Júsipovtiń bastamalary keńes músheleriniń Halyq Keńesimen ózara is-qımyl jasaý tártibine qatysty boldy.
Otyrysqa Qazaqstan Respýblıkasy Prezıdentiniń janyndaǵy Qazaqstan strategııalyq zertteýler ınstıtýtynyń dırektory Jandos Shaımardanov, «Qazaqstandyq qoǵamdyq damý ınstıtýty» KEAQ Basqarma tóraǵasy Juldyzaı Ysqaqova jáne basqa da tulǵalar qatysty.
