Qoshanov: Qazaqstan men Belarýs — senimdi strategııalyq seriktes
MINSK. KAZINFORM – Májilis spıkeri Erlan Qoshanov Belarýs Respýblıkasyna resmı saparmen bardy. Bul týraly Májilistiń baspasóz qyzmeti habarlady.
Ol Mınskide el Prezıdenti Aleksandr Lýkashenkomen, Ulttyq jınalystyń Ókilder palatasynyń basshysy Igor Sergeenkomen jáne Respýblıka Keńesiniń tóraǵasy Natalıa Kochanovamen kezdesti. Taraptar ekijaqty qarym-qatynastyń joǵary deńgeıin atap ótip, parlamentaralyq yntymaqtastyqty keńeıtý perspektıvalaryn talqylady.
Belarýs Respýblıkasynyń Prezıdenti Aleksandr Lýkashenkomen kezdesýde Erlan Qoshanov Qazaqstan Prezıdenti Qasym-Jomart Toqaevtyń zor yqylasy men izgi tilegin jetkizip, halyqtarymyzdyń arasyndaǵy tereń tarıhı baılanysty atap ótti. Ol eki el Prezıdentteriniń senimdi saıası qarym-qatynasynyń arqasynda búginde Qazaqstan-Belarýs baılanysy strategııalyq áriptestik deńgeıine kóterilgenine erekshe toqtaldy. Saýda-ekonomıka, óndiris, aýyl sharýashylyǵy, kólik jáne basqa da salalardaǵy yntymaqtastyqtyń joǵary qarqyny — sonyń naqty nátıjesi.
Erlan Qoshanov Belarýs basshysyna búginde Prezıdent bastamasymen Qazaqstanda júrgizilip jatqan aýqymdy saıası ózgerister týraly aıtyp berdi. Elimizde memlekettiń qoǵamdyq-saıası jáne quqyqtyq arhıtektýrasyn túbegeıli jańǵyrtatyn jańa Konstıtýtsııanyń jobasy keńinen talqylanýda. Ata zańnyń jańa jobasy boıynsha túpkilikti sheshimdi búkilhalyqtyq referendýmda el azamattary qabyldaıdy.
Aleksandr Lýkashenko Prezıdent Qasym-Jomart Toqaevqa jyly lebizderin joldady. Ol qazirgi kúrdeli kezeńde eki el arasyndaǵy yntymaqtastyqty nyǵaıtýdaǵy parlamentarıılerdiń rólin erekshe atap ótti. Bul oraıda Belarýs pen Qazaqstannyń kóppolıarlylyq pen egemendi memleketterdiń damýyn qoldaıtynyn, halyqaralyq kún tártibinde ortaq ustanymǵa ıe ekenin aıtty. Sondaı-aq Shanhaı Yntymaqtastyq Uıymyna kirý kezinde Belarýsti qoldaǵany úshin Qazaqstanǵa alǵysyn bildirdi.
Belarýs basshysy Qazaqstanmen aradaǵy qazirdiń ózinde 1 mlrd dollardan asqan taýar aınalymynyń joǵary ósý qarqynyna oń baǵa berip, mashına jasaý men aýyl sharýashylyǵyndaǵy kooperatsııany keńeıtýge shaqyrdy.
Ulttyq jınalystyń Ókilder palatasynyń basshysy Igor Sergeenkomen kezdesýde parlamentaralyq dıalogtan bastap eki el arasyndaǵy ekonomıkalyq, mádenı yntymaqtastyqqa deıingi keń aýqymdaǵy máseleler talqylandy.
— Qazaqstan men Belarýs — senimdi strategııalyq seriktes. Memleketter basshylary muny únemi aıtyp keledi. Eki el arasynda jemisti saıası dıalog jolǵa qoıylǵan. Ónerkásipte, mashına jasaýda jáne agrarlyq salada kooperatsııalyq baılanys keńeıip jatyr. Eki memlekettiń parlamentteri de ózara qarym-qatynastyń qarqyndy damýyna zor úles qosyp otyr. Zań shyǵarý isinde turaqty tájirıbe almasý jolǵa qoıylyp, dostyq toptary belsendi ári nátıjeli jumys istep jatyr, depýtattarymyzdyń arasynda bekem baılanys ornaǵan, — dedi Májilis spıkeri.
Óz kezeginde Igor Sergeenko Qazaqstan Belarýs eli úshin árdaıym ýaqyt synynan ótken dos, strategııalyq seriktes ári odaqtas bolyp qala beretinin aıtty. Ol Astana sııaqty Mınski de syndarly, biriktiretin kún tártibin halyqaralyq alańdarda ilgeriletýge basymdyq beretinine mán berdi.
Ókilder palatasynyń tóraǵasy Qazaqstanda júrgizilip jatqan reformalar baǵytyn joǵary baǵalady. Qazaqstannyń túrli saladaǵy zań shyǵarý jumysyndaǵy tájirıbesin Belarýs depýtattary jan-jaqty zerdelep otyrǵanyn atap ótti.
Spıkerler tsıfrlandyrý salasyndaǵy parlamentterdiń qyzmetine de erekshe nazar aýdardy. Májilis tóraǵasy Memleket basshysynyń úsh jyl ishinde Qazaqstandy tsıfrlyq memleketke aınaldyrý mindetin alǵa qoıǵanyna toqtaldy. Osy rette depýtattar ázirlegen Tsıfrlyq kodeks pen Jasandy ıntellekt týraly zań kúshine endi. Astanada halyqaralyq JI ortalyǵy, «Astana Hub» tehnoparki qarqyndy jumys istep tur, sondaı-aq Ortalyq Azııadaǵy eń qýatty sýperkompıýter iske qosyldy.
Kezdesý qorytyndysy boıynsha depýtattar zańnamalyq jumys boıynsha ózara tájirıbe almasýdy jalǵastyrýǵa, parlamentaralyq uıymdar aıasynda, sonymen qatar dostyq toptary, salalyq komıtetter men parlamentter apparattary jelisi boıynsha yqpaldastyqty nyǵaıtýǵa ýaǵdalasty.
Erlan Qoshanov eki eldiń zań shyǵarýshy organdary arasyndaǵy áriptestikti damytý máselelerin Respýblıka Keńesiniń tóraǵasy Natalıa Kochanovamen de talqylady.
— Bizdiń parlamentaralyq qarym-qatynasymyz qarqyndy damyp keledi. Jeke baılanystyń arqasynda ózara senim men qurmet nyǵaıýda. Parlamentaralyq uıymdar sheńberinde de tyǵyz baılanystamyz. Bir-birimizdiń bastamalarymyzǵa qoldaý bildirýde de jaqsy tájirıbe bar. Biz Parlamentaralyq Odaq, TMD Parlamentaralyq Assambleıasy, UQShU jáne EQYU Parlamenttik Assambleıalary aıasyndaǵy ózara dástúrli yqpaldastyqty odan ári keńeıtýge nıettimiz, — dedi Májilis tóraǵasy.
Eki el arasyndaǵy mádenıet jáne bilim berý salalary boıynsha parlamenttik qoldaýdy keńeıtý, jastarǵa arnalǵan birlesken jobalardy iske asyrý, týrızm men ınnovatsııa baǵytynda ónerkásiptik kooperatsııany damytý boıynsha ekijaqty yntymaqtastyqty kúsheıtý máseleleri qamtylǵan mazmundy áńgime órbidi.
Ulttyq jınalystyń Ókilder palatasy men Respýblıka Keńesinde ótken kezdesýlerde Erlan Qoshanov Belarýs depýtattaryna Qazaqstanda júrgizilip jatqan Konstıtýtsııalyq reformala týraly aıtyp berdi. Ol jańa Konstıtýtsııanyń jobasy Qazaqstan Parlamentiniń quzyretin edáýir kúsheıtetinin, qoǵamnyń saıasatqa aralasýyn keńeıtetinin jáne «Kúshti Prezıdent — yqpaldy Parlament — esep beretin Úkimet» formýlasyn nyǵaıtatynyn erekshe atap ótti.
Sapar aıasynda Májilis depýtattary Mınskidegi Jeńis monýmentine gúl shoǵyn qoıdy. «BELAZ» zaýytyna jáne «Hatyn» memlekettik memorıaldyq keshenine baryp, Ekinshi dúnıejúzilik soǵys qurbandaryn eske aldy.
Aıta ketelik Qazaqstan men Belarýs ıadrolyq jáne radıatsııalyq qaýipsizdik salasynda memorandýmǵa qol qoıǵan edi.