Qoshanov Qaraǵandydaǵy sý qoımalaryn aralap qaıtty
QARAǴANDY. QazAqparat - Qaraǵandy oblysynyń TJD mamandary óńirdegi kóktemgi sý tasqynyna qatysty jaǵdaı turaqty ekenin jetkizdi. Oblys ákimi Erlan Qoshanov jaǵdaıdyń shyn máninde baqylaýda ekenine kóz jetkizý úshin sý qoımalaryn aralap qaıtty, dep habarlaıdy QazAqparat tilshisi.
Qaraǵandy oblysyndaǵy barlyq jol asty sý ótkizý qubyrlary men kópirler tazalandy. Negizgi sý qoımalarynda sý aǵyzý jalǵasty, barlyq gıdrobeketterde baqylaýda. Azamattyq qorǵaý kúshteri dálirek aıtqanda, barlyq aýdandarǵa bólingen 6,4 myń adam jáne 2,4 myń tehnıka tolyǵymen daıyn tur.
Búgin óńir basshysy Erlan Qoshanov sýdyń qalaı aǵyzylyp jatqanyn óz kózimen kórip qaıtý úshin Samarqand sý qoımasynda bolyp qaıtty.
Oblys ákiminiń orynbasary Ermaǵanbet Bólekpaev ózenniń joǵarǵy jaǵynda ylǵal qory 38% ǵa deıin tómendegenin, sý aǵyny sekýndyna 30 tekshe metrdi quraıtynyn málimdedi.
«Jalpy jaǵdaı turaqty. Eshqandaı qaýip joq. Sherýbaı men Nura ózenindegi sý deńgeıi normanyń sheginde. Tómengi jaǵynda qar áli de bar. Bul Nura jáne Osakarov aýdandary. Olardyń jaǵdaıyn biz baqylaýda ustaımyz», - dedi Ermaǵanbet Bólekpaev
Oblys ákimi meteorologtardyń boljamyna qyzyǵýshylyq tanytty. Ol sondaı-aq mamandardyń ólsheýlerdi nege tek ózen arnalarynda ótkizetinin jáne búıirlik aǵyndarǵa jetkilikti kóńil bólmeıtindigin surady.
«Barlyǵyn qarap shyǵyńyzdar, etik kıińizder de, sonda baryńyzdar, barlyǵyn ólsheńizder! Ózen boıymen joǵary júrińizder! Áli qansha qar qalǵanyn tekserip shyǵyńyzdar. Biz sý qoımasyna jaqyn ornalasqan aýyldardy sý basýyna jol bermeýimiz kerek. Ol úshin qardy ólshep, qansha sý keletinin bilý qajet», - dep atap ótti Erlan Qoshanov.
«Qazsýshar» Qaraǵandy fılıalynyń dırektory Dúısembaı Ábjanov gıdrobeketter ózenderdiń negizgi arnalaryn ǵana ólsheıtindigin rastady. Ol sondaı-aq Samarqand sý qoımasynda turaqty jaǵdaı ustalyp, barlyǵy qadaǵalanyp otyrǵanyn málimdedi. Bir táýlik ishinde sý aǵyzýdyń arqasynda ondaǵy deńgeı ózgermegen. Biraq jaqyn kúnderi sý kóp bolady dep kútilýde.
«Sý deńgeıiniń kóterilýiniń eń joǵarǵy kórsetkishi taıaýdaǵy eki-úsh kúnde bolady dep kútiledi. Jaǵdaı osy qalypta bolsa, barlyǵy tegis ótýi tıis», - dedi Dúısenbaı Ábjanov.
Qazir oblys boıynsha qar jamylǵysy 40 paıyzǵa azaıdy. Osakarov jáne Nura aýdandarynda 60% qar qaldy. Qarqaraly jáne Buqar jyraý aýdandaryndaǵy tórt ózenderde seńdi buzý úshin muz jaryldy. Osy aptada Osakarov jáne Nura aýdandarynda jarylys jumystary júrgiziledi.
Samarqand sý qoımasyn teksergennen keıin Erlan Qoshanov óziniń orynbasary Ermaǵanbet Bólekpaevqa jergilikti jerlerde barynsha egjeı-tegjeıli ólsheý jumystaryn uıymdastyrýdy tapsyrdy. Nátıjeler týraly úsh kún ishinde baıandaý kerektigi aıtyldy.
