Qoshanov qala ákimine erte turyp, qalany aralaýdy tapsyrdy
ASTANA. QazAqparat - Qaraǵandy oblysynyń ákimi Erlan Qoshanov oblys ortalyǵy basshysyna qoqystar men las kósheler úshin syn aıtty. Bul týraly QazAqparat ákimniń resmı saıtyna silteme jasap habarlaıdy.
«Qalany qoqystan jaqsyraq tazartý qajet. Keshe tańerteń men Qaraǵandyny aralap shyqtym. Túsinikti, árıne, qar endi ǵana eridi, biraq biz qoqysqa kómilip jatyrmyz. Bir aptadan soń men únemi qalany aralaýǵa shyǵatyn bolamyn. Nurlan Erikbaıuly (Qaraǵandy qalasynyń ákimi- avt.), siz qalanyń basshysy retinde erterek oıanyńyz. Men emes, Siz qalany únemi aralap otyrýyńyz kerek», - dedi Erlan Qoshanov Qaraǵandynyń ákimine apparattyq jınalys barysynda.
Oblys ákimi Sátpaev kóshesine nazar aýdardy, onda jóndeý jumystarynan soń kóptegen shuńqyrlar kórinip, asfalt jabyndysy buzylyp jatyr.
«Men tańerteń Sátpaev kóshesiniń boıymen júrip óttim - bir saý jer joq! Al jóndeý jumystary 2016 jyly ǵana jasalǵan. Siz ol kósheni kórdińiz be? Problema nede? Eki jyl da ótip úlgergen joq qoı», - dep narazylyǵyn bildirdi Erlan Qoshanov.
Qaraǵandy qalasynyń ákimi Nurlan Áýbákirov merdigerlerdiń sózine súıenip, olar barlyq problema sýdan deıdi.
Mundaı jaýap oblys ákiminiń kóńilin toltyrmady. Ol zańdyq turǵyda bas merdigerden joldyń sapasyna jaýap berýin talap etý kerektigin aıtty.
