Kóshi-qon zańnamasyn buzǵany úshin Ózbekstannyń tórt azamaty elden shyǵaryldy

PAVLODAR. KAZINFORM – Kóshi-qon zańnamasyn buzǵandardy polıtseıler anyqtady. Sheteldik tórt azamattyń Qazaqstan aýmaǵynda júrgenine 30 táýlikten asyp ketken.

Pavlodar oblysy Sharbaqty aýdanynyń polıtsııa qyzmetkerleri reıdtik is -sharalar júrgizý barysynda el aýmaǵynda zańsyz júrgen Ózbekstan Respýblıkasynyń azamattaryn anyqtady. Olar kóshi-qon zańnamasyn buzyp, elden ketýden jaltarǵan.

«Sheteldik tórt azamat ótken jyldyń qarashasynda Qazaqstanǵa kelip, sodan beri aıaldap qalǵan. Zań boıynsha olar 30 táýlik ishinde Qazaqstan Respýblıkasynan tys jerlerge shyǵýǵa tıis bolǵan. Biraq sheteldikter belgilengen merzimde ketýden jaltaryp, sol arqyly kóshi-qon salasyndaǵy zańnamany buzdy. Quqyq buzýshylarǵa ákimshilik materıal toltyryldy jáne sot sheshimimen Qazaqstan Respýblıkasynan tys jerlerge májbúrli túrde shyǵarý týraly ákimshilik shara qoldanyldy» dep habarlady Pavlodar oblysy polıtsııa departamentiniń baspasóz qyzmeti.

Tártip saqshylary olardy Reseı Federatsııasyna bara jatqan avtobýsqa alyp baryp, otyrǵyzyp jibergen. 

Jyl basynan beri Pavlodar oblysynda kóshi-qon zańnamasyn buzǵan 13 sheteldik azamat elden shyǵaryldy.