Kóshi-qon zańnamasyn buzǵan sheteldik azamattar Qazaqstannan shyǵaryldy
PAVLODAR. KAZINFORM - Polıtseıler zańsyz júrgen sheteldik azamattarǵa jumys ornyn jáne baspana usynatyn turǵyndar jaýapkershilikke tartylatynyn eskertip otyr.
Ertis-Baıan óńirinde zańsyz eńbek qyzmetin júzege asyrý jáne el aýmaǵynda zańsyz bolý derekteri boıynsha Ózbekstan men Tájikstannyń azamattary ustalyp, sot sheshimimen el aýmaǵynan shyǵaryldy.
Óńirlik polıtsııa departamentiniń málimetinshe, Ekibastuz polıtseıleri eńbek qyzmetin zańsyz júzege asyrýdyń eki deregin anyqtaǵan. Jergilikti zaýyttardyń birinde Ózbekstan Respýblıkasynyń alty azamaty jáne qaıtalama shıkizatty qaıta óńdeý tsehynda Tájikstan Respýblıkasynyń eki azamaty ustalǵan.
«Sheteldik azamattarda ýákiletti organnyń tıisti ruqsaty bolmaı shyqty, al jumys berýshi sheteldik azamattardyń bolýy týraly polıtsııaǵa habarlamaǵan. Kóshi-qon zańnamasyn buzǵany úshin zań buzýshylarǵa qatysty materıaldar sotqa jiberildi. Sondaı-aq Pavlodarda Tájikstan Respýblıkasynyń azamaty eńbek qyzmetin ýákiletti organnyń ruqsatynsyz júzege asyrǵan. Ol tólqujatynyń jaramdylyq merzimi aıaqtalǵanyna qaramastan Qazaqstan aýmaǵynda júre bergen. Sheteldik qabyldaǵysh-taratqysh mekemesine ornalastyryldy. Al oǵan baspana usynǵany úshin pavlodarlyq turǵynǵa 49 myń teńgeden astam aıyppul salyndy. Kóshi-qon zańnamasyn buzǵany úshin tórt sheteldik sot sheshimi boıynsha Qazaqstannan shyǵaryldy», - dep habarlady polıtsııa departamentinen.
Jergilikti polıtseıler arnaıy tekserý is-sharalaryn júrgizip, bir kúnde 55 ákimshilik quqyq buzýshylyqtyń jolyn kesken. Onyń 33-in shetel azamattary jasaǵan.
Eske sala keteıik, 175 sheteldik taksı júrgizýshisi el aýmaǵynan shyǵaryldy.