Kóshi-qon saıasaty jańarady: «Altyn vıza» men tsıfrlyq platformalar engiziledi
ASTANA. KAZINFORM — Qazaqstan joǵary bilikti mamandardy tartý baǵytyndaǵy kóshi-qon saıasatyn jańartpaq. Osy másele «Eńbek resýrstaryn damytý ortalyǵy» alańynda ótken dóńgelek ústelde talqylanyp, qatysýshylar «Altyn vıza», «QazETA» tsıfrlyq platformasy jáne sheteldik ınvestorlar men mamandarǵa arnalǵan jańa múmkindikterdi qarastyrdy. Bul týraly Eńbek mınıstrligi málim etti.
«Eńbek resýrstaryn damytý ortalyǵy» AQ alańynda ótken is-sharaǵa memlekettik organdar, halyqaralyq uıymdar, sarapshylar men ǵylymı qaýymdastyqtyń ókilderi qatysty. Atap aıtqanda, Halyqaralyq kóshi-qon uıymy, «Astana» halyqaralyq qarjy ortalyǵy, QR Prezıdenti janyndaǵy Qazaqstandyq strategııalyq zertteýler ınstıtýty, L. N. Gýmılev atyndaǵy Eýrazııa ulttyq ýnıversıteti jáne «Atameken» QR UKP ókilderi pikir almasty.
Dóńgelek ústel barysynda qatysýshylar Qazaqstannyń joǵary bilikti mamandar, ınvestorlar men halyqaralyq qabiletti mamandardy tartýǵa baǵyttalǵan zamanaýı kóshi-qon saıasatyn qalyptastyrý, adamı kapıtaldy damytý jáne kóshi-qon úderisterin tsıfrlandyrý máselelerin talqylady.
Sheteldik kapıtaldy tartý tetikterin jańǵyrtý máselesine erekshe nazar aýdaryldy. Sonymen qatar sheteldik mamandar, ınvestorlar men kásipkerler úshin Qazaqstanǵa kelý, turý jáne uzaq merzimdi eńbek etýge qolaıly jaǵdaı jasaý máseleleri qaraldy.
QR Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev jańa saıasattyń syrtqy jáne ishki kóshi-qondy tıimdi retteýge, sheteldik adamı kapıtaldy tartýǵa jáne kóshi-qon rásimderin tolyq tsıfrlandyrýǵa baǵyttalǵanyn atap ótti.
— Qujatta «QazETA» biryńǵaı tsıfrlyq platformasyn «e-Residency» modýlimen engizý, «e-Residency Invest» baǵdarlamasyn iske qosý, sondaı-aq joǵary bilikti mamandar, ınvestorlar men kásipkerler úshin birqatar artyqshylyqtardy kózdeıtin arnaıy «Altyn vızany» engizý qarastyrylǵan, — dedi Erbol Tuıaqbaev.
Onyń aıtýynsha, «Altyn vıza» jańa kóshi-qon saıasatynyń negizgi quraldarynyń birine aınalady. Bul tetik strategııalyq ınvestorlar men ekonomıkaǵa qajetti joǵary bilikti mamandardyń mártebesin quqyqtyq alańda uzaq merzimdi bekitýge baǵyttalǵan.
Usynylǵan bastamalar sarapshylar tarapynan oń baǵa aldy. QR Prezıdenti janyndaǵy QSZI Ekonomıkalyq saıasatty taldaý bóliminiń basshysy Anna Alshanskaıa jahandyq báseke jaǵdaıynda memleketter bilikti kadrlar úshin kúresti kúsheıtip, adamı kapıtaldy ornyqty ekonomıkalyq ósimniń negizgi draıverleriniń biri retinde qarastyryp otyrǵanyn atap ótti.
— Qazaqstan bilikti mamandardy tartýdyń óńirlik ortalyǵy retinde proaktıvti pozıtsııa ustana otyryp, ishki mobıldilikti teńgerimdi aýmaqtyq damýdyń mańyzdy resýrsy retinde paıdalana alady, — dedi ol.
Bastamalarǵa Halyqaralyq kóshi-qon uıymynyń ókilderi de qoldaý bildirdi. Uıym ókilderiniń pikirinshe, ıkemdi ári ashyq kóshi-qon júıesin qalyptastyrý — Qazaqstannyń jahandyq básekege beıimdelýindegi mańyzdy qadam.
— Memleket basshysynyń sheshimin iske asyrý halyqaralyq bilikti mamandar men ınvestıtsııalardy tartýǵa ǵana emes, sonymen qatar qazaqstannyń jastaryn bolashaq eńbek naryǵyna beıimdeýge de jańa múmkindikter ashady, — dep atap ótti HKQU mıssııasy basshysynyń m. a. Álııa Belonosova.
Dóńgelek ústel qorytyndysy boıynsha qatysýshylar halyqaralyq tájirıbeni eskere otyryp kóshi-qon saıasatyn odan ári jetildirýdiń, adamı kapıtaldy damytýdyń jáne memlekettik qyzmetterdi tsıfrlandyrýdyń mańyzdylyǵyn atap ótti. Sondaı-aq bul bastamalar Qazaqstannyń óńirlik bilikti mamandar habyna aınalýyna serpin beretini aıtyldy.
Eske sala keteıik, buǵan deıin sheteldik bilikti mamandar men ınvestorlar úshin qandaı qolaıly jaǵdaı jasalatynyn jazdyq.
