Kóshi-qon saıasaty: Premer-mınıstr mınıstrlerge birneshe mindet júktedi
ASTANA. KAZINFORM — Úkimet basshysy Oljas Bektenov elimizdiń kóshi-qon saıasatyn jetildirýge qatysty quzyrly organdarǵa tapsyrma berdi.
— Birinshi tapsyrma, Eńbek jáne halyqty áleýmettik mınıstrligi múddeli memlekettik organdarmen birlesip, bıyl 1 qazanǵa deıin Úkimetke Qazaqstan Respýblıkasynyń kóshi-qon jáne demografııalyq saıasaty tujyrymdamasynyń jobasyn engizsin. Ol ázirlenip jatqan 2030 jylǵa deıingi óńirlik saıasat tujyrymdamasyna sáıkes bolýǵa tıis. Ekinshi tapsyrma, óńirlerde qandastar men ishki qonys aýdarýshylarǵa barlyq qajetti kómek kórsetip, járdem berý kerek, — dedi Oljas Bektenov Úkimet otyrysynda.
Sondaı-aq Premer-mınıstr Eńbek jáne halyqty áleýmettik qorǵaý mınıstrligi múddeli memlekettik organdarmen birlesip, qandastar arasynda elge kelgenge deıin aldyn ala saýalnama júrgizý quralyn engizýdi tapsyrdy.
— Bul qandastardyń jeke jáne kásibı artyqshylyqtaryn baǵalaýǵa múmkindik beredi. Olardy elimizdiń soltústik jáne shyǵys óńirlerine tartý boıynsha aqparattyq-túsindirý jumysyn kúsheıtý kerek. Úshinshi tapsyrma, Іshki ister mınıstrligi men barlyq múddeli memlekettik organ kóshi-qon zańnamasyn buzǵany úshin ákimshilik jaýapkershilik sharasyn qatańdatýdy qamtamasyz etýge tıis. Jalpy, kóshi-qon salasyndaǵy qaýipsizdik máselesin kúsheıtý qajet, — dep tolyqtyrdy Oljas Bektenov.
Atalǵandy tapsyrmany baqylaý men úılestirý Úkimet basshysynyń orynbasary Ermek Kósherbaevqa júkteldi.
Aıta keteıik, jyl sońyna deıin elimizde kóshi-qon protsesin retteıtin tsıfrlyq platforma engiziledi.
Odan bólek Premer-mınıstr kóshi-qon saıasaty salasyna taldaý jasaý qajettigin aıtqan edi.