Kóshi-qon salasyna taldaý jasaý qajet — Úkimet basshysy

ASTANA. KAZINFORM — Úkimet basshysy Oljas Bektenov zańsyz kóshi-qonǵa qatysty júıeli sheshim qabyldaýdy tapsyrdy. 

— Jahandyq geosaıası ózgerister men mıgratsııalyq aǵynnyń kúsheıýi jaǵdaıynda halyqtyń kóshi-qon máselesi asa mańyzdy basymdyqqa aınalyp otyr. Memleket basshysynyń tapsyrmasyna sáıkes, naqty retteletin kóshi-qon saıasatyn qalyptastyrý kerek. Ol úshin normatıvtik quqyqtyq bazaǵa aýdıt júrgizip, memlekettik organdardyń kóshi-qon salasyndaǵy fýnktsıonaldyq múmkindikterine taldaý jasaý qajet, — dedi Oljas Bektenov Úkimet otyrysynda.

Sondaı-aq Premer-mınıstr kóshi-qon salasynda zań buzý faktileri baryn aıtty.

— Zańsyz kóshi-qon, óńiraralyq dısproportsııa jáne kóshi-qon aǵynyn biryńǵaı esepke alýdyń bolmaýy sııaqty barlyq ózekti másele boıynsha júıeli ári keshendi sheshim qabyldanýǵa tıis. Sońǵy 2 jylda Qazaqstanda turaqty turatyn sheteldikterdiń sany bir jarym ese artqan, — deıdi ol.

Aıta ketsek, bıyl 1 mln-ǵa jýyq shetel azamaty Qazaqstanǵa kelýge ótinish bergen.