Kóshi-qon rejımin buzǵan 200 myń shetel azamaty jaýapqa tartyldy — ІІM

ASTANA. KAZINFORM — Qazaqstanǵa keletin shetel azamattarynyń deni kóshi-qon erejesin saqtaıdy. Bul týraly Іshki ister mınıstriniń birinshi orynbasary Baýyrjan Álenov málim etti.

— Elimizge keletin shetel azamattarynyń 97% zań men kóshi-qon rejımin saqtaıdy. Árıne, zań buzylǵan jaǵdaıda jaýapkershilikke tartylady. Bıyl ishki ister organdary 200 myń sheteldikti jaýapqa tartty, onyń ishinde 46 myń sheteldik elde bolý tártibin buzǵan. Sonyń ishinde 10 myń shetel azamatyna Qazaqstanǵa 5 jylǵa deıin kirýge tyıym salynyp, elden shyǵaryldy, — dedi Baýyrjan Álenov Úkimet otyrysynda.

Odan bólek elimizde 2 myń jumys berýshi sheteldiń jumys kúshin zańsyz paıdalanǵany úshin jaýapqa tartylǵan.

— Shetel azamattaryn jumysqa alý qaǵıdasyn birneshe ret buzǵandarǵa qatysty 7 qylmystyq is qozǵaldy. Osy oraıda, eskeretin jaıt, qylmystyq quqyqbuzýshylyq jasaǵandar jazasyz qalmaıdy, — deıdi Іshki ister mınıstrdiń birinshi orynbasary.

Buǵan deıin shetel azamattary Qazaqstanǵa qandaı maqsatpen jıi keletini týraly jazǵan edik. 

Aıta keteıik, bıyl 1 mln-ǵa jýyq shetel azamaty Qazaqstanǵa kelýge ótinish bergen. 

Sondaı-aq Premer-mınıstr kóshi-qon saıasatyn jetildirýge qatysty mınıstrlerge birneshe mindet júktedi.