Kóshi-qon daǵdarysy: Túrkııa men Iran shekarasynda býferlik aımaq qurylýy múmkin

ASTANA. KAZINFORM — Irandaǵy kóshi-qonnyń aýqymdy tolqynynan qaýiptengen Túrkııa bıligi shyǵys shekarasynda býferlik aımaq qurýy múmkin, dep habarlaıdy Kazinform menshikti tilshisi.

Mynet.com basylymynyń jazýynsha, Túrkııa AQSh-tyń Iranǵa yqtımal áskerı aralasýy jaǵdaıynda keshendi sharalar ázirlep jatyr, Ankaranyń boljamynsha, bul úlken kóshi-qon tolqynyn týdyrýy múmkin. Eldiń Syrtqy ister mınıstrligi kez kelgen stsenarııge daıyn ekenin jáne qazirdiń ózinde «A, V jáne S josparlary» qolda bar ekenin málimdedi.

Habarlanǵandaı, Túrkııa SІM ókilderi Uly ulttyq jınalystyń Halyqaralyq ister jónindegi komıssııasynyń (Túrkııa Respýblıkasy Parlamenti) múshelerin Taıaý Shyǵysta, ásirese Iran men Sırııadaǵy qazirgi jaǵdaı týraly aqparattandyrdy. Kezdesý barysynda Túrkııanyń aımaq elderiniń isterine syrttyń aralasýyn qoldamaıtyny jáne turaqtylyqtyń saqtalýyn qoldaıtyny atap ótildi.

Túrik BAQ-ynyń málimetinshe, mınıstrlik Iranǵa qarsy yqtımal operatsııa bosqyndardyń jappaı aǵynyna ákelýi múmkin dep sanaıdy. Osyǵan baılanysty Ankara olardyń Túrkııa aýmaǵyna ótýine jol bermeý úshin shekaranyń Iran jaǵynda býferlik aımaq qurý ıdeıasyn qarastyryp otyr.

Túrik dıplomattary sondaı-aq Iran ishindegi jaǵdaı týraly keıbir derekter keltirdi. Olardyń málimetinshe, jaqynda bolǵan narazylyqtar kezinde 4 myńnan astam adam qaza taýyp, shamamen 20 myń adam jaraqat alǵan. Bul sandar Túrkııanyń jaǵdaıdyń odan ári ýshyǵýyna jáne onyń búkil aımaq úshin saldaryna qatysty alańdaýshylyǵyn arttyryp otyr.

Buǵan deıin AQSh-tyń ushaqtasymaldaǵysh toby Taıaý Shyǵysqa jetkenin jazǵanbyz. USS Abraham Lincoln ushaqtasyǵyshy jáne ony súıemeldegen kemeler Taıaý Shyǵys aımaǵynda ózderiniń qorǵanys múmkindikterin arttyrý jáne óńirlik turaqtylyqty saqtaý maqsatynda ornalasqan.