«Qosarlanǵan bılik» týraly áńgimeni qashqyn urylar shyǵaryp júr - Nazarbaev
«Men munyń barlyǵyn estip, oqyp otyrmyn. Bul qýlyq áreketten shyǵyp otyr. Ósekti Qazaqstanda turaqtylyqty qalamaıtyn adamdar ádeıi shyǵaryp otyr. Osy jerde tóbelestiń, qosarlanǵan bıliktiń bolǵan qalaıdy. Bizdiń Otanyn satqan qashqyn urylar, ana jaqtan halyqtyń tynysh ómirin buzý úshin osyndaı aqparattardy taratyp otyr. Munyń eshqandaı negizi joq. Sebebi Qazaqstan basqarýdyń prezıdenttik formasy bar ýnıtarly memleket sanalady», - dedi QR Tuńǵysh Prezıdenti.
Elbasynyń atap ótýinshe, mundaı forma Frantsııa, Reseı, AQSh bıliginde bar.
«ıAǵnı, Qasym-Jomart Toqaevty búkil halyq saılaǵan. Ol - Prezıdent. Maǵan qatysty aıtar bolsam, sizderge ol da belgili. Zańǵa sáıkes men Qaýipsizdik keńesiniń tóraǵasymyn. Biraq, bul alqalyq organ, men tóraǵamyn. Al ol jerde eldiń barlyq basshylary múshe bolyp sanalady jáne biz qatelik jibermeý úshin ujym bolyp sheshemiz. Meniń de mártebem konstıtýtsııalyq zańmen Elbasy dep aıqyndalǵan. Meniń mindetim - eń aldymen Qaýipsizdik keńesiniń jumysyn qamtamasyz etý, «Nur Otan» partııasyna, Qazaqstan halqy Assambleıasyna basshylyq jasaý. Buǵan qosa qurylýyna ózim qatysqan kóptegen halyqaralyq uıymdar maǵan atalǵan organdardyń qurmetti tóraǵasy bolýdy usyndy. Demek, jumys jetedi. Shaqyryp jatyr. Men ol jaqqa baramyn. Óıtkeni, Qazaqstannyń múddesin qorǵap, Qazaqstanǵa jańa dostar, ınvestorlar tabamyn. Osy turǵyda jumys istelip jatyr. Árıne, Prezıdent Toqaev menimen aqyldasady. Maǵan júgingen kezde ózimniń ómirlik mol tájirıbemmen el úshin bólisemin«, - dedi Elbasy.
