Kosarev mindetti medıtsınalyq saqtandyrýdy 2 jylǵa keıinge shegerýdi usyndy
ASTANA. QazAqparat - QR Parlamenti Májilisiniń «Mindetti áleýmettik medıtsınalyq saqtandyrý máseleleri boıynsha keıbir zańnamalyq aktilerge ózgerister men túzetýler engizý týraly» zań jobasyn talqylaý boıynsha jumys tobynyń otyrysynda depýtat Vladıslav Kosarevtiń mindetti medıtsınalyq áleýmettik saqtandyrýdy 2 jylǵa shegere turý týraly usynysyn talqylady.
«Biz úlken isti qolǵa alyp jatqandyqtan, daıyndyq jumystary baıypty, ári jumsaq bolýy úshin osy usynysty engizdik. Eger biz birden engizip jibersek, kóptegen qatelikter jasap qoıamyz, a l eger soza tursaq - onda negizdi túrde daıyndalamyz», - dedi V.Kosarev talqylaý barysynda.
Depýtattyń oıynsha, qazirgi ýaqytta jarnany tóleý jumys berýshilerge úlken qarjylyq salmaq salýy yqtımal. Daǵdarys barysynda onsyz da úlken qıyndyqtarǵa tap bolǵan bıznes úshin bul aýyr soqqy bolýy ábden múmkin. Sonymen qatar medıtsınalyq qyzmetterdi ákimshilendirý máseleleri túbegeıli sheshimin tappaǵan.
Esterińizge sala keteıik, Qazaqstanda úzdik halyqaralyq tájirıbeni esepke ala otyryp memleket, jumys berýshi jáne árbir adamnyń yntymaqty jaýapkershiliginiń negizinde ázirlengen medıtsınalyq saqtandyrý júıesin engizý jumystary bastalady. Sonymen qatar, memleket ekonomıkalyq belsendiligi tómen halyq úshin jarna tóleıtin bolady. Jumys berýshiler - jaldamaly jumysshylar úshin, qyzmetkerler men salyq organdarynda tirkelgen ózin-ózi qamtyǵan azamattar ózderi úshin tóleıtin bolady.
Jumys berýshiler tóleıtin jarna ólsheminiń jalpy mólsheri tabystyń 5 paıyzyn quraıdy. Bul rette jarna aýdarý 2017 jyldan birtindep ósedi: 2017 jyly - 2 paıyz, 2018 jyly - 3 paıyz, 2019 jyly - 4 paıyz jáne 2020 jyly - 5 paıyz. Bul tólem korporatıvtik tabys salyǵynyń esebinen shegeriletindikten, jumys berýshige túsetin naqty salmaq 2017 jyly - 1,6 paıyz, 2018 jyly - 2,4 paıyz, 2019 jyly - 3,2 paıyz, 2020 jyly - 4 paıyzdy quraıtyn bolady. Al jumys isteıtin azamattardyń ózderi tóleıtin jarna ólshemi tabystyń 2 paıyzyn quraıdy.
