Qosalqy bólshek retinde ákelingen avtokólikti zańdastyrý sharttaryn aıqyndaıtyn qaýly ázirlendi

ASTANA. QazAqparat – Shetelden qosalqy bólshek retinde ákelingen avtokólikti zańdastyrý sharttaryn aıqyndaıtyn Úkimet qaýlysynyń jobasy ázirlendi. Bul týraly QR ІІM Ákimshilik polıtsııa komıtetiniń tóraǵasy Qaısar Sultanbaev aıtty, dep habarlaıdy QazAqparat tilshisi.

«Qazirgi ýaqytta Іshki ister mınıstrligi qosalqy bólshekter retinde ákelingen avtokólikterdi zańdastyrý sharttaryn aıqyndaıtyn Úkimet qaýlysynyń jobasyn ázirledi», - dedi Qaısar Sultanbaev ІІM baspasóz qyzmeti alańynda ótken brıfıngte.

Onyń atap ótýinshe, atalǵan joba jarııa talqylaýdan ótti.

«Biz olardy qorytyndylap bolǵannan keıin memlekettik organdarǵa túpkilikti kelisýge jiberemiz. Odan keıin Úkimetke engizemiz. Zańdastyrý jumystary jalǵasýda», - dedi komıtet tóraǵasy.

Esterińizge sala ketsek, buǵan deıin elimizge shetelden ákelingen 69 myńnan astam kóliktiń zańdastyrylǵanyn jazǵan edik.