Qos taǵdyrdy aman alyp qalyp, ózi baqılyqqa attandy — áriptesteri Uldana Myrzýandy eske aldy

ASTANA. KAZINFORM — Astanada 10 kúnnen beri jansaqtaý bóliminde jatqan jedel járdem feldsheri baqılyq boldy. 23 jastaǵy Uldana Myrzýan ústine kirpish qulaǵan azamattardy qutqaramyn dep júrgen jerinde basyna kondıtsıoner qulaǵan. Buǵan deıin Uljan kómekke kelgen jerde bala da bolǵany habarlanǵan. Biraq Densaýlyq saqtaý basqarmasy aýrýhanaǵa tek 3 eresek adamnyń jetkizilgenin málimdedi, dep habarlaıdy Jibek Joly telearnasy.

Marqumdy «jumysyna óte adal edi» dep eske alady áriptesteri. 23 jastaǵy kelinshek 5 jyldan beri jedel járdem qyzmetinde naýqastarǵa barynsha kómek berip júrgen feldsher bolǵan. 8 qarashada, ıaǵnı qaıǵyly oqıǵa bolar kúni de qyzmettik mindetin atqaryp júrgen. Ústine kirpish qulaǵan 2 adamǵa alǵashqy kómek kórsetýge kelgen. Sol sátte onyń basyna tóbeden kondıtsıoner qulaǵan. Sóıtip, sońǵy 10 kún jansaqtaý bóliminde jatqan edi. Biraq búgin baqılyq bolyp ketti.

— 8 qarashadan beri jansaqtaý bóliminde óte aýyr jaǵdaıda bolǵan patsıentke barlyq qajetti medıtsınalyq kómek kórsetilgen. Alaıda, naýqas tym aýyr jaraqat alǵandyqtan qaıtys boldy, — deıdi qalalyq qoǵamdyq densaýlyq saqtaý basqarmasynyń baspasóz hatshysy Aqbaıan Arapshaeva.

Feldsherdiń áriptesi onyń jumysyna jaýapty maman bolǵanyn aıtady.

— Uldana — óz isiniń bilikti mamany. Ol árqashan óz isine uqypty ári jaýapty boldy. Jan-jaqtaǵylarǵa óte meıirimdi edi. Adamdarmen tez aralasyp ketedi. Júregi jumsaq, meıirimdi adam edi. Ol ózin dáleldedi osy ýaqytqa deıin. Qandaı maman ekenin aınalasyndaǵylarǵa, otbasyna dáleldegen adam, — deıdi marqumnyń áriptesi Dıana Hapbar.

Áriptesteri Uldananyń áreketi - naǵyz kásibı batyrlyqtyń, qaısarlyq pen adamgershiliktiń úlgisi ekenin aıtady. Marqum 2 apta buryn ǵana turmysqa shyǵyp, baqytty sátterin ótkerip júripti. Bolashaqqa qurǵan jospary kóp bolǵan.

— Bul qaza - tek onyń týystary úshin ǵana emes, búkil medıtsınalyq qaýymdastyq, áriptesteri jáne elorda turǵyndary úshin de zor qaıǵy. Ózgeniń ómiri men densaýlyǵyn bárinen joǵary qoıǵan Uldana Myrzýannyń jarqyn beınesi qaısar da meıirimdi jan retinde bizdiń júregimizde máńgi saqtalady, — deıdi Densaýlyq saqtaý mınıstri Aqmaral Álnazarova.

Qos taǵdyrdy aman alyp qalyp, ózi baqılyqqa attanǵan Uldananyń erligi men jarqyn beınesi júrekterde sónbeıtin jaryq bolyp qala bermek.

Bálkim, kómekke kelgen feldsherdiń basyna kondıtsıonerdiń qulaýy oqys jaǵdaı da shyǵar. Biraq kópqabatty úılerdiń terezesinen ilingen qondyrǵylardyń durys ilingenin tekserý qajet-aq. Áıtpese, mundaı oqıǵalardyń qaıtalanbasyna kelildik joq.

Búgin Memleket basshysy qyzmettik boryshyn úlgili atqarǵany, qıyn-qystaý jaǵdaıda kórsetken erligi men janqııarlyǵy úshin Uldana Myrzýandy «Erligi úshin» medalimen marapattaý týraly Jarlyqqa qol qoıdy.