Qos palataly Parlament respýblıkalyq jáne óńirlik múddelerdi tolyq qamtyp otyr - A. Sýdın

Búgin Parlament Senatynda «Qazirgi zamanǵy parlamentarızm: qalyptasýy, damýy jáne zań shyǵarý protsesinde bılik tarmaqtary arasyndaǵy ózara is-qımyldy jetildirý» taqyrybynda ótip jatqan halyqaralyq konferentsııada Senat Tóraǵasynyń orynbasary Aleksandr Sýdın osylaı málim etti.

«Qazaqstandyq parlamentarızm óziniń tarıhı kezeńinde jarqyn oqıǵalarǵa toly kúrdeli joldardy júrip ótti. Atap aıtqanda, Qazaq handyǵynyń quryltaı jıyndarynda halyq ókilderiniń qatysýynan bastap, búgingi qos palataly kásibı Parlamentke de jetti. Evolıýtsııalyq damý kezeńderi týraly aıtqanda, elimizdiń taǵy bir tarıhı paraǵyna toqtalmaı ketýge bolmaıdy. Bul qazaqtan saılanǵan depýtattardyń Reseı ımperııasyndaǵy birinshi jáne ekinshi Memlekettik Dýmasynyń jumysyna qatysýy. Al budan keıingi damý kezeńi Qazaqstannyń Joǵarǵy Keńesi edi», dedi A. Sýdın.

Onyń aıtýynsha, zamanaýı talaptarǵa saı keletin ókildik organ táýelsizdiktiń 1995 jyly qabyldanǵan Ata zań negizinde júzege asty. Osy Konstıtýtsııa buǵan deıingi memlekettik qurylymnyń olqylyqtaryn joıdy.

«Búgingi qos palataly Parlament jalpy respýblıkalyq jáne óńirlik múddelerdi tutastaı qamtyp otyr. Osy arqyly quqyqtyń qazaqstandyq júıesi qalyptasty. Respýblıkada memlekettik qurylymdy jetildirý protsesi udaıy júrip jatyr. Atap aıtqanda, bizdiń demokratııalyq ınstıtýttarymyz jetilip, Elbasynyń bastamasymen birqatar saıası reformalar júzege asty. Parlamenttiń ókilettigi artyp, saıası partııalar róli keńeıdi», dedi Senat Tóraǵasynyń orynbasary.