Qos palataly kásibı Parlament 2 myńnan astam zań qabyldady

Búgin Astanada ótken «Qazaqstan Respýblıkasynyń Tuńǵysh Prezıdenti - Elbasy N. Nazarbaevtyń Qazaqstanda parlamentarızmniń qalyptasýyndaǵy róli» atty konferentsııa barysynda Májilis tóraǵasy Nurlan Nyǵmatýlın osylaı málim etti.

Spıkerdiń aıtýynsha, ortasha eseppen alǵanda bir shaqyrylymda shamamen 500-ge tarta zań jobalary qaralǵan. «Árıne, qazaqstandyq parlamentarızm úlgisin odan ári damytýdyń mańyzdy qyry onyń kóppartııalyqqa qaraı jańǵyrýy bolyp tabylady. Al mundaı baǵyttaǵy birinshi qadam 1998 jyly proportsııaly saılaý júıesin engizý arqyly jasalǵan bolatyn. Bunyń ózi qoǵamdaǵy saıası partııalardyń rólin arttyrdy», - dedi ótken tájirıbelerdi saralaı kele spıker N. Nyǵmatýlın.

Májilis tóraǵasynyń aıtýynsha, 2007 jyly Memleket basshysynyń bastamasymen jańǵyrǵan Konstıtýtsııalyq ózgerister de Parlamenttiń damýy júrisin údetti.

«Osy jyldardaǵy Konstıtýtsııalyq reforma Prezıdenttik respýblıkadan Prezıdenttik-parlamenttik basqarýǵa negizdelgenin Elbasy da aıtqan bolatyn. Al sol jolǵy reformanyń basty mańyzy Májilis depýtattaryn saılaý júıesine engizilgen ózgeristerge qatysty bolyp tabylady. Bunyń ózi demokratııalandyrýǵa qatysty mańyzdy qadam bolatyn. Óıtkeni, proportsııaly júıe boıynsha depýtattardy saılaý saıası partııalardyń rólin arttyryp, olardyń qoǵamdaǵy belsendiligin kótere túsedi», - dedi N. Nyǵmatýlın.