Qos palata depýtattary Alataýǵa konstıtýtsııalyq mártebe beretin zań jobasyn qaraıdy
ASTANA. KAZINFORM – Búgin Parlament palatalarynyń birlesken otyrysy ótedi. Onda depýtattar «Alataý qalasynyń arnaýly mártebesi týraly» konstıtýtsııalyq zańnyń jobasyn ekinshi oqylymda talqylap, qabyldaý múmkin. Konstıtýtsııalyq zań qabyldanǵan jaǵdaıda osy aıdyń sońyna deıin Prezıdent qaraýyna engizý josparlanǵan.
Esterińizge sala ketsek, zań jobasyn palata depýtattary 20 naýryzda birinshi oqylymda maquldaǵan edi. Qujatty depýtattarǵa tanystyrǵan Premer-mınıstrdiń orynbasary Qanat Bozymbaevtyń aıtýynsha, zań jobasyn ázirleýge jetekshi halyqaralyq sarapshylar tartylyp, olar arnaıy ákimshilik jáne ekonomıkalyq aımaqtar arqyly qalalardy damytý boıynsha Shenchjen, Haınan (Qytaı), Sedjon men Songdo (Koreıa), sondaı‑aq Sıngapýr, Dýbaı jáne Doha sııaqty qalalardyń tájirıbesin zerdelegen.
– Halyqaralyq tájirıbe kórsetkendeı, qalaǵa tek arnaıy mártebe berý jetkiliksiz. Negizgi róldi tıimdi ınstıtýtsıonaldyq orta atqarady. Mysaly, Shenchjen men Haınan tájirıbesi – bul óńirlerde jergilikti ákimshilikterge keń ókilettikter berilgen. Olar salyq rejımderin bekite alady, jeńildikterdi ákimshilendiredi jáne ınvestıtsııalyq qoldaýdy basqarady. Nátıjesinde sheshimder jedel qabyldanady, ortalyq organdarmen fýnktsııalary qaıtalanbaıdy. Haınan provıntsııasy odan da keń ekonomıkalyq ókilettikter aldy. Osy jyldan bastap Haınan jańa saýda jáne ınvestıtsııalyq hab retinde jarııalandy. Osylardy eskere otyryp, Alataý qalasynda da ákimshilik salyq rejımderin bekitý, jeńildikterdi jáne ınvestıtsııalyq qoldaýdaǵy derbestikti engizýdi usynyp otyrmyz. Bul ásirese Qazaqstanda áli tolyq engizilmegen jańa salalar úshin mańyzdy, - dedi vıtse-premer.
Qanat Bozymbaevtyń sózine qaraǵanda, Alatau City Authority strategııalyq damýǵa negizdelgen jańa memlekettik organ retinde qurylady. Onyń negizgi baǵytyn Premer mınıstr basqaratyn keńes aıqyndaıdy. Al ákimshilik jumysty Bas atqarýshy dırektor júzege asyrady. Keńes qaladaǵy negizgi strategııalyq sheshimderdi qabyldaıdy jáne ákimshilik aktilerdi bekitedi. Al máslıhat pen ákimdik qalanyń áleýmettik, kommýnaldyq jáne qoǵamdyq máselelerine jaýap beredi.
– Alataý qalasynda naqty bólinis bolady. Ákim men máslıhat áleýmettik sala, ınfraqurylym, kommýnaldyq sharýashylyǵy syndy aǵymdaǵy máselelermen aınalysady. Onyń ózi bıýdjeti bolady. Alatau City Authority-diń memlekettik qory jasaqtalady. Ol memlekettik organ sııaqty. Onyń óz damý bıýdjeti bolady. Ol damýmen aınalysady, ıaǵnı atalǵan qalany damytý strategııasyn jasaıdy. Olar Alataý qalasy úshin zań sııaqty bolatyn barlyq aktilerdi daıyndap, ony Alataý qalasyn damytý jónindegi keńes qabyldaıdy. Keńesti Premer-mınıstr basqaryp, quramyn Prezıdent bekitedi. Keminde úshte biri táýelsiz dırektorlar bolady, - dedi Qanat Bozymbaev.
Zań jobasynda ınvestıtsııalyq kelisimderdiń turaqtylyǵy, arnaıy quqyqtyq rejımniń basymdyǵy jáne lıtsenzııalaýdyń jeke tártibi qarastyrylǵan. Sondaı aq «bir tereze» qaǵıdaty arqyly táýelsiz retteý júıesi engiziledi. Investorlardyń quqyqtary halyqaralyq deńgeıde qorǵalady. Olar Astana qarjy ortalyǵynyń nemese halyqaralyq arbıtrajdy tańdaı alady.
Salyqtyq preferentsııalar tek basym salalardaǵy jańa ınvestıtsııalyq jobalarǵa beriledi.
Bul jobalar negizgi krıterıılerge sáıkes bolýy tıis.
Olar:
– ekonomıkalyq jáne áleýmettik tıimdiligi;
– qalanyń strategııalyq qujattaryna sáıkestigi;
– eksportqa baǵdarlanýy jáne ınnovatsııalyq sıpattylyǵy;
– ekologııalyq talaptardy qamtýy.
– Alatau City Authority respýblıkalyq bıýdjettik baǵdarlamalardyń derbes ákimshisi bolady. Onyń bıýdjeti respýblıkalyq bıýdjet quramynda bloktyq bıýdjetteý qaǵıdaty boıynsha qalyptasyp, negizinen ınfraqurylymdy damytýǵa jáne uzaq merzimdi jobalardy qoldaýǵa baǵyttalady. Óz kezeginde jobalardy irikteý men qarjylandyrý tártibin Keńes bekitetin bolady, - dedi ol.
Úkimet basshysy orynbasarynyń atap ótýinshe, qalanyń damýy strategııalyq qujattarǵa negizdeledi. Investorlar úshin turaqtylyqty saqtaý maqsatynda atalǵan qujattarǵa ózgerister tıisinshe 10 jáne 5 jyl ishinde bir retten jıi engizilmeıdi. Jer qatynastary arnaıy rejım arqyly retteledi. Qalanyń jer qory qalyptastyrylady.
– Qala bastapqydan «Digital by default» qaǵıdatyna negizdelip qurylady, ıaǵnı barlyq negizgi qyzmetter tsıfrlyq formatta jumys isteıdi. Qalada ınnovatsııalyq tehnologııalardy engizý úshin eksperımentaldy quqyqtyq rejımder qarastyrylady. Bul baılanys, tsıfrlyq jeliler, jasandy ıntellekt, robottyq júıeler jáne avtonomdy kólik sııaqty salalardy qamtıdy. Alatau City Authority dyń tsıfrlyq platformasy arqyly rezıdentterge negizgi qyzmetter usynylatyn bolady. Olardyń ishinde ruqsat berý rásimderi jáne arnaıy quqyqtyq rejımdi qoldaný josparlanyp otyr. Bul júıeler memlekettik aqparattyq júıelermen biriktiriledi, - dedi vıtse-premer.
Al Májilis depýtaty Nurtaı Sabılıanov Alataý qalasynyń negizgi qaǵıdattaryn túsindirdi jáne qala bıýdjeti qandaı túsimderden quralatynyn aıtyp berdi.
– Alataý qalasynyń jıyntyq bıýdjeti qalanyń jergilikti bıýdjeti men ákimshiliktiń bıýdjetinen turady. Jergilikti bıýdjet jeke tabys salyǵy, áleýmettik salyq, múlik salyǵy, kólik quraldaryna salynatyn salyq, Almaty oblysynyń jergilikti bıýdjetinen beriletin transfertter jáne ózge de salyqtary men alymdary esebinen qalyptasady. Bul túsimder jergilikti memlekettik basqarýdy qamtamasyz etýge jáne áleýmettik salany qarjylandyrýǵa jumsalady, - dedi depýtat.
