Qos palata arasyndaǵy komıssııa azyq‑túlik qaýipsizdigi jónindegi zań jobasyn qaraıdy
ASTANA. Qarashanyń 12-si. QazAqparat /Qanat Mámetqazyuly/ ‑ Búgin QR Parlamenti Senatynyń jalpy otyrysynda palata depýtattary «QR keıbir zańnamalyq aktilerine azyq-túlik qaýipsizdigi máseleleri boıynsha ózgerister men tolyqtyrýlar engizý týraly» zań jobasyna baılanysty qos palata arasynda kelispeýshilikterdi eńserý úshin kelisim komıssııa quramyna Senat depýtattaryn saılady,
dep habarlaıdy QazAqparat.
Esterińizge sala keteıik, atalǵan zań jobasynyń maqsaty elimizdiń azyq-túlik qaýipsizdigin qamtamasyz etý máseleleri boıynsha zańnamany jetildirý bolyp tabylady. Sondaı-aq jobada respýblıka halqynyń azyq-túlik taýarlarymen ózin-ózi qamtamasyz etýiniń jetkilikti deńgeıine qol jetkizý sharalary zań júzinde qarastyrylady. Qujatta elimizdiń azyq-túlik qaýipsizdigi máselesine erekshe nazar aýdarylyp, bul baǵyttyń basymdyǵyn eskere otyryp, ony ulttyq qaýipsizdik turǵysynda qarastyrý kózdelgen. Atap aıtqanda, qujatta azyq-túlik qaýipsizdigine tóngen qater ulttyq qaýipsizdikke tóngen qater retinde qarastyrylady. Osyǵan oraı, qoldanystaǵy «Ulttyq qaýipsizdik týraly» zańǵa «azyq-túlik qaýipsizdigi» týraly uǵym engiziledi jáne táýelsiz memlekettiń azyq-túligin saqtaý úshin otandyq agroónerkásip keshenin ornyqty damytý ulttyq múddeler tizimine engiziletin boldy.
Májilis maquldaǵan zań jobasyna Senat 53 túzetý engizgen bolatyn. Osynyń basym bóligimen Májilis depýtattary kelispeýshilik tanytqan bolatyn.
