Qos azamattyqty boldyrmaý týraly talap naqty sóz tirkesimen jazyldy

ASTANA. KAZINFORM – Qazaqstannyń jańa Konstıtýtsııa jobasynda azamattyq máselesine qatysty talaptar kúsheıtildi. Endi «basqa eldiń azamattyǵy tanylmaıdy» degen bulyńǵyr uǵymnyń ornyna, «tyıym salynady» degen qatań norma keledi.

Qoldanystaǵy Konstıtýtsııanyń 10-babynda «Respýblıka azamatynyń basqa memlekettiń azamattyǵynda bolýy tanylmaıdy» dep kórsetilgen. Jańa Konstıtýtsııa jobasynda bul máseleniń núktesi qoıylyp, «jol berilmeıdi» degen úzildi-kesildi talap engizildi.

– Qazaqstan Respýblıkasynyń azamatynda qos nemese kóp azamattyǵy bolýyna jol berilmeıdi. Ózge el azamattyǵynyń bolýy Qazaqstan Respýblıkasynyń azamattyǵyn toqtatýǵa negiz bolady, – Konstıtýtsııanyń jańa jobasy, 13-bap.

Sonymen qatar qoldanystaǵy Konstıtýtsııada quqyqbuzýshylyqtyń quqyqtyq saldary jazylmaǵan. Al jańa Konstıtýtsııa jobasynda ózge eldiń tólqujatyn alý – QR azamattyǵyn toqtatýǵa tikeleı negiz ekendigin jazady.

Aıta keteıik, jańa jobanyń mátininde lıngvıstıkalyq sapaǵa mán berilgen. Qoldanystaǵy Konstıtýtsııanyń 10-babyndaǵy orys tilinen tikeleı aýdarma «bolyp tabylady» degen shubalańqy tirkes jańa nusqada alynyp tastalyp, oı jınaqy ári taza qazaq tilinde jetkizilgen.

Buǵan deıin Konstıtýtsııalyq komıssııa Memleket basshysyna jańa Konstıtýtsııanyń qorytyndy jobasyn usynǵanyn jazǵan edik.

Jańa Konstıtýtsııa jobasynyń tolyq mátini saıtymyzda jarııalandy.