Qos mınıstr men 6 adam qaza tapty: Ganada tikushaq apatqa ushyrady

ASTANA. KAZINFORM – Gana Respýblıkasynyń Qorǵanys mınıstri Edvard Omane Boama jáne Ekologııa, ǵylym jáne tehnologııalar máseleleri jónindegi mınıstri Ibragım Mýrtala Muhammed áskerı tikushaq apatynan qaza tapty. Bul týraly el úkimetiniń resmı ókilderi málimdegen, dep jazady Report agenttigi Reuters-ke silteme jasap.

Aqparatqa sáıkes, tikushaq eldiń ońtústigindegi Akrofýon qalasynyń mańynda qulaǵan. Jerge qulaǵannan keıin áýe kóligi otqa oranǵan. 

Buǵan deıin eldiń qarýly kúshteri radardan joǵalyp ketken tikushaq týraly málimdegen bolatyn. Gana ÁÁK-ne (áskerı-áýe kúshteri) tıesili tikushaq bortynda úsh ekıpaj múshesi jáne bes jolaýshy bolǵan. Bas shtab bastyǵynyń aıtýynsha, eshkim tiri qalmaǵan.

Mınıstrler zańsyz tabıǵı resýrstar óndirý júrgizilip jatqany týraly jedel aqparat túsken óńirge bara jatqan bolatyn. Qazir oqıǵaǵa baılanysty tergeý bastaldy.

Aıta keteıik, buǵan deıin AQSh-ta medıtsınalyq ushaq apatqa ushyrap, 4 adam qaza tapqanyn habarladyq.