Qos qyzyn oqýǵa túsirmek bolǵan aqtóbelik sheneýnik jumysyna qaıta orala almaıdy
AQTÓBE. QazAqparat - Eki qyzyn iri kólemdegi aqshamen oqýǵa túsirmek bolǵan aqtóbelik sheneýnik jumysyna qaıta orala almaıdy. №2 qalalyq sottyń sýdıasy Aıdana Mámbetqazıeva talapker Almat Ermaǵambetovtyń aryzyn qanaǵattandyrǵan joq, dep habarlaıdy QazAqparat tilshisi.
Keshe №2 Aqtóbe qalalyq sotynda oblystyq densaýlyq saqtaý basqarmasy basshynyń burynǵy orynbasary Almat Ermaǵambetovtiń jumysyna qaıta ornalasý týraly aryzy qaraldy. Sotqa oblystyq densaýlyq saqtaý basqarmasynyń zańgeri, Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departament zańgeri, Almat Ermaǵambetovtyń jubaıy qatysqan bolatyn. Búgin bul iske sot sheshim shyǵardy.
«Azamat Almat Ermaǵambetov Ádep keńesi shyǵarǵan sheshimdi joqqa shyǵaryp, jumystan qalǵan kúnderiniń eńbekaqysyn óndirýdi talap etken bolatyn. Talapker aryzy qanaǵattandyrylmaıdy. Talapker Ermaǵambetov sheshimmen kelispegen jaǵdaıda bir aıdyń ishinde appelıatsııalyq shaǵym túsire alady», - dedi sýdıa Aıdana Mámbetqazıeva.
Aıta keteıik, Almat Ermaǵambetov memlekettik qyzmetker bola tura qyzdaryn Nazarbaev mektebi men Nazarbaev ýnıversıtetindegi kýrstarǵa túsirý úshin Qylmystyq kodekstiń «Alaıaqtyq» baby boıynsha sottalyp jatqan Botogóz Bıekenovaǵa 7 mıllıon teńgeden astam aqsha bergen. Keıin onyń isi qoǵamdyq talas týdyryp, Ádep keńesi memlekettik qyzmetke kir keltirgen sheneýnikti jumystan shyǵarý týraly uıǵarym jasaıdy . Uıǵarymdy oblystyq densaýlyq saqtaý basqarmasy oryndady.
