Qos Koreıa basshylary úshinshi kezdesýdiń ýaqytyn belgiledi
ASTANA. QazAqparat - Ońtústik Koreıa prezıdenti Mýn Chje In 18-20 qyrkúıekte Soltústik Koreıada ótetin sammıtke qatysyp, Soltústik Koreıa kóshbasshysy Kım Chen Ynmen kezdesedi. Bul týraly Phenıanǵa saparynan keıin Seýlde brıfıng ótkizgen prezıdenttiń arnaıy elshisi Mýn Chon Yı En málim etti, dep habarlaıdy QazAqparat Renhapqa silteme jasap.
Chonnyń aıtýynsha, Koreıa Respýblıkasy men KHDR Phenıanda úshinshi sammıtti ótkizýge, sondaı-aq kelesi aptanyń basynda atalmysh sammıt týraly talqylaý úshin joǵary deńgeıdegi kelissózder ótkizýge kelisken.
Mýn Chje In men Kım Chen Yn alǵash ret 27 sáýirde Panmýndjom aýylynda kezdesken edi. Al ekinshi márte 26 mamyrda júzdesti.
Chonnyń málimdeýinshe, aldaǵy sammıtte eki el basshylarynyń Panmýndjomdaǵy birinshi kezdesýinde qol jetkizilgen joǵary deńgeıdegi koreıaaralyq kelisimderdiń júzege asyrylý barysy qaralady.
Baspasóz máslıhatynda atap ótilgendeı, Soltústik Koreıa kóshbasshysy Koreıa túbegin tolyqtaı ıadrolyq qarýsyzdandyrýǵa ustamdylyǵyn rastap, Ońtústik Koreıamen ǵana emes, sondaı-aq Qurama Shtattarmen tyǵyz yntymaqtastyq jasaýǵa daıyn ekendigin jetkizgen.
Memleket basshylary sammıt barysynda, sondaı-aq Seýl men Phenıan arasyndaǵy áskerı shıelenisti odan ári tómendetý joldaryn talqylamaq.
«Eki el ózara senimdi nyǵaıtýdyń naqty joldary men qarýly qaqtyǵystardyń aldyn alýdy talqylaýǵa kelisti», - dedi Chon.
Osy maqsatta taraptar úshinshi sammıt bastalǵanǵa deıin Keson qalasynda birlesken baılanys bólimderin ashýǵa ýaǵdalasqan.
