Qos qazaqstandyq dzıýdoshy Eýropa ashyq kýbogynyń júldegeri atandy
NUR-SULTAN. QazAqparat - Qos qazaqstandyq dzıýdoshy Reseıdiń Orynbor qalasynda ótip jatqan Eýropa ashyq kýbogynyń qola medalin jeńip aldy, dep habarlaıdy QazAqparat tilshisi.
Qazaqstan dzıýdo federatsııasynan málim etkenindeı, Ǵumar Qyrǵyzbaev pen Ańsarbek Ǵaınýllın júldegerler qatarynan kórindi.
Ǵ.Qyrǵyzbaev 66 kg salmaqta jubanysh fınalynda ázerbaıjandyq Nýrlan Osmanovty taza jeńdi. Jarystyń jartylaı fınalyna deıin súrinbegen Ǵumar sodan keıin reseılik Murat Shopanovqa ese jiberdi.
Batysqazaqstandyq A.Ǵaınýllın 73 kg salmaqta taǵy bir qola júldeni el qorjynyna saldy. Ol jarys barysynda 7 kezdesý ótkizip, sonyń altaýynda jeńiske jetti.
Eýropa ashyq kýbogy 19 mamyrda márege jetedi.
