Qos qazaqstandyq boksshy qyz jastar arasynda álem chempıony atandy

ASTANA. QazAqparat – Ispanııanyń La-Nýsııa qalasynda jastar arasynda bokstan ótken álem chempıonatynda Qazaqstan ulttyq quramasy eki altyn, eki kúmis, úsh qola medal jeńip aldy, dep habarlaıdy QazAqparat tilshisi.

Jalpykomandalyq esepte qazaqstandyqtar Anglııamen úshinshi oryndy bólisti. Olardyń esebinde de osynshama júlde bar.

Ózbekstan quramasy bes altyn, úsh kúmis, eki qolamen kósh basyna kóterilse, úndistandyqtar (4 altyn, 3 kúmis, 3 qola) ekinshi orynǵa ıe boldy.

Bul birinshilikte, ásirese, qazaqstandyq qyzdar tabysty óner kórsetip, bes medalǵa (2 altyn, 3 qola) qol jetkizdi. Medal sany jóninen qyzdar Úndistanǵa (2 altyn, 2 kúmis, 3 qola) ǵana jol berdi.

Elına Bazarova 54 kelige deıingi salmaqta fınalda germanııalyq Kýtsohrıstoý Krısovalantýdy aıqyn basymdylyqpen utyp, chempıon atandy.

Sondaı-aq Baqyt Seıdish 66 kelige deıingi salmaqta taǵy bir germanııalyq Karlotta Shýenemannan sheberligi basym ekendigin anyq kórsetip, jeńis tuǵyryna kóterildi.

Gúlnaz Bóribaeva (48 kg), Ásem Tańatar (63 kg) jáne Ásel Toqtasyn (+81 kg) qola júldeni qanaǵat tutty.

Jigitterden Nurbek Mursal (67 kg) men Dáýlet Tólemisov (75 kg) sońǵy básekede ózbekstandyq boksshylarǵa ese jiberip, kúmis medaldi enshiledi. Jigitter jalpykomandalyq esepte onynshy orynǵa syrǵyp ketti.

Eske sala keteıik, budan buryn bokstan Azııa chempıonatynda Qazaqstan jalpykomandalyq esepte birinshi oryn alǵanyn jazǵan bolatynbyz.