Qos qazaqstandyq balýan jastar arasynda álem chempıonatynyń kúmis júldegeri atandy
NUR-SULTAN. QazAqparat – Qazaqstandyqtar Altyn Shaǵaeva men Anastasııa Panasovıch Bolgarııa astanasy Sofııada 20 jasqa deıingiler arasynda ótip jatqan álem chempıonatynyń kúmis júldegeri atandy, dep habarlaıdy QazAqparat tilshisi.
Fınalǵa deıin súrinbeı jetken Altyn Shaǵaeva 53 kelige deıingi salmaqta úndistandyq Antımge 0:8 esebimen ese jiberdi.
A.Shaǵaeva jartylaı fınalda mysyrlyq Atef Mohamedti utqan bolatyn.
Batysqazaqstandyq Anastasııa Panasovıch 72 kelige deıingi salmaqta jartylaı fınalda japonııalyq Sýmıre Nııkýreden basym tústi. Áıtse de fınalda amerıkalyq Amıt Elorge jol berdi.
Batys Qazaqstan oblysynyń taǵy bir ókili Zeınep Baıanova qola júlde úshin básekede ýkraınalyq Oleksandra Homenetske ese jiberdi.
18 tamyz kúni Mereı Bazarbaev 57 kelige deıingi salmaqta kúmis, Mádına Aman (59 kg) qola júldege ıe bolǵan edi.
