Qos qazaqstandyq balýan qyz álem chempıonatynyń júldegeri atandy
ASTANA. QazAqparat Býhareste 23 jasqa deıingiler arasynda kúres túrlerinen ótip jatqan álem chempıonatynda qos qazaqstandyq balýan qyz qola júldeger atandy, dep habarlaıdy QazAqparat tilshisi.
Qazaqstan grek-rım, erkin jáne áıelder kúresi federatsııasy málim etkenindeı, Marına Sedneva men Gúlmaral Erkebaeva úzdik úshtikke ilikti.
M.Sedneva 55 kg salmaqta qola júlde úshin básekede reseılik Marına Sımonıandy 9:0 esebimen oısyrata utty.
G.Erkebaeva 76 kg salmaqta rýmynııalyq Katalına Aksentendi dál osyndaı eseppen tize búktirdi.
Qazaqstandyqtardyń taǵy bir qola júldeden úmiti bar. Jámıla Baqbergenova 72 kg salmaqta túrik balýanyna jol berdi. Ol qola júlde úshin úndistandyq nemese ıtalııalyq balýannyń bireýimen kilemge shyǵady.
Eske sala keteıik, budan buryn grek-rım kúresi sheberleri Qaharman Qısmetov pen Amanǵalı Bekbolatovtyń álem chempıonatynyń qola júldegeri atanǵanyn jazǵan bolatynbyz.
Býhareste 23 jasqa deıingiler arasynda kúres túrlerinen ótip jatqan dúnıejúzilik doda 18 qarasha kúni márege jetedi.
