Qos qazaqstandyq dzıýdo tóreshisi IJF halyqaralyq dárejege ıe boldy
ALMATY. KAZINFORM – Almaty qalasynda Halyqaralyq dzıýdo federatsııasynyń (IJF) uıymdastyrýymen dzıýdo tóreshilerine arnalǵan halyqaralyq emtıhan óz máresine jetti.
Qazaqstanda úshinshi ret ótkizilgen bul mańyzdy is-shara elimizdegi tóreshiler daıarlaý júıesiniń joǵary deńgeıin taǵy bir márte kórsetti.
Qazaqstan dzıýdo federatsııasynyń baspasóz qyzmetinen málim etkenindeı, emtıhannyń praktıkalyq kezeńi Beket Mahmutovty eske alýǵa arnalǵan jasóspirimder men jastar arasyndaǵy Azııa kýbogy aıasynda ótti.
Atalǵan jarysta tórelik etken 11 elden kelgen 19 tóreshi óz kásibı biliktiligin dáleldedi.
Qazaqstandyq tóreshiler Tımýr Ajımov (Aqtóbe oblysy) pen Ádil Bısenquly (Mańǵystaý oblysy) sátti nátıje kórsetip, IJF halyqaralyq sanattaǵy tóreshi (IJF International Category) ataǵyna ıe boldy. Sondaı-aq Polsha, Mysyr, Ońtústik Koreıa, Reseı, Qyrǵyzstan, Úndistan, Iran, Nıderland, Japonııa jáne Saýd Arabııasynan kelgen tóreshiler de emtıhannan súrinbeı ótip, halyqaralyq dárejege qol jetkizdi.
Tóreshiler jumysyna jáne emtıhan barysyna Halyqaralyq dzıýdo federatsııasynyń bas referı dırektorlary Danıel Laskaý men Armen Bagdasarov, Azııa dzıýdo odaǵynyń (JUA) bas tóreshiler dırektory Osaka Akınabý men JUA referı-dırektory Ashat Jıtkeev jetekshilik etti.
Aıta keterligi, qazirgi tańda Qazaqstanda 11 halyqaralyq, 17 kontınentaldyq jáne 20 ulttyq dárejedegi dzıýdo tóreshisi bar.
Eske sala keteıik, budan buryn dzıýdodan Azııa kýbogynyń alǵashqy jarys kúni kimder úzdik shyqqanyn jazǵan edik.
Sondaı-aq dzıýdodan Azııa kýbogynda qazaqstandyq egiz qyzdar júldege ilikti.