Qos eldiń azamattyǵyn alǵan qazaqstandyqtar kóp pe
ASTANA. QazAqparat - 2017 jyly Qazaqstanda qosarlanǵan azamattyǵy bar 600-ge jýyq adam anyqtalyp, jaýapkershilikke tartyldy. Bul týraly búgin Májilistegi Úkimet saǵatynda depýtat Nurlan Ábdirov aıtty, dep habarlaıdy QazAqparat.
«Qosarlanǵan azamattyq ta mańyzdy problemalardyń biri bolyp otyr. Konstıtýtsııada Qazaqstan azamattary ózge memlekettiń azamaty bolyp moıyndalmaıdy delingen. Degenmen, bizdiń elimizdiń azamattyǵynan shyqpastan shetel azamattyǵyn alý jaǵdaılary jıi kezdesip jatady. Іshki ister mınıstrliginiń málimetinshe, 2017 jyly qosarlanǵan azamattyq úshin shamamen 600 adam jazaǵa tartyldy», - dedi Nurlan Ábdirov.
Onyń aıtýynsha, bizdiń azamattardyń ózge eldiń azamattyǵyn alýy máselesi boıynsha sheteldik dıplomatııalyq ókildiktermen turaqty baılanys ornatý qajet.
«Qazaqstan azamattyǵyna qabyldaý, sonymen qatar jeńildetilgen tártippen ony alý barysynda, sheteldik azamattyqtan shyqqandyǵyn dáleldeıtin qujattardy usyný talap etiledi. Aıta keteıin, 2017 jyly bizdiń elimizdiń azamattyǵyn jeńildetilgen tártippen 30 myńnan astam adam aldy», - dedi Májilis depýtaty.
