Qos eldiń azamattyǵymen júrgen áıel Qazaqstan aýmaǵynan shyǵaryldy

ALMATY. QazAqparat - Kólik polıtseıleri Túrkııa azamatshasyn qos el azamattyǵyn paıdalanǵany úshin ákimshilik jaýapkershilikke tartty, dep habarlaıdy QazAqparat.

Almaty qalasynyń áýejaıynda jelilik polıtsııa bóliminiń qyzmetkerleri «Antalııa-Almaty» áýe reısimen ushyp kelgen Qazaqstan jáne Túrkııanyń qos azamattyǵy bar 1987 jyly týǵan áıeldi anyqtady.

Oǵan qatysty QR ÁQBtK 496-babynyń 2-bóligi, ıaǵnı, Qazaqstan zańnamasynda belgilengen merzimde shetel azamattyǵyn alý faktisin habarlamaý boıynsha ákimshilik hattama toltyryldy.

Almaty qalasynyń mamandandyrylǵan aýdanaralyq ákimshilik sotynyń sheshimimen Túrkııa azamatshasy 5 jyl merzimge QR aýmaǵynan ákimshilik jolmen shyǵaryp jiberý túrindegi jaýapkershilikke tartyldy.

Aıta keteıik, jyldyń basynan beri kólik polıtseıleri qos el azamattyǵy bar 3 azamatty anyqtady, onyń ekeýi - Túrkııa, al bireýi - AQSh azamaty.