Qos el Prezıdentterine Orta dálizdi damytý jobasy tanystyryldy
ASTANA. KAZINFORM — Qasym-Jomart Toqaev pen Ilham Álıevke Orta dálizdi damytý jobasy tanystyryldy. Bul týraly Aqorda málim etti.
Memleketter basshylaryna qazaq-ázerbaıjan mamandarynyń Orta dálizdi damytý boıynsha atqaryp jatqan júıeli jumystary jóninde málimet berildi.
Qazaqstan Prezıdentiniń keńesshisi Ásel Janasova Orta dálizdi damytý josparyn tanystyrdy. Bul – Qytaı men Ortalyq Azııa memleketterin Eýropa elderimen baılanystyratyn negizgi kólik-logıstıkalyq baǵyt.
Qasym-Jomart Toqaev pen Ilham Álıevke Qytaıdan Ázerbaıjanǵa tasymal kóleminiń ulǵaıýy Orta dálizdiń damýyna tyń serpin bergeni jóninde baıandaldy. Búginde júk Qytaı shekarasynan Grýzııa porttaryna deıin 15-18 kúnde jetkiziledi. Boljamǵa sáıkes, 2030 jylǵa qaraı bul baǵyttaǵy júk aınalymy úsh ese artýy múmkin.
Memleketter basshylaryna Orta dálizdiń tıimdiligi men básekege qabilettiligin kúsheıtýge, sondaı-aq Eýrazııadaǵy tranzıttik rólin nyǵaıtýǵa baǵyttalǵan naqty sharalar jáne bastamalar týraly aıtyldy.
Aıta keteıik, buǵan deıin Memleket basshysy Ázerbaıjan Prezıdentimen kelissóz júrgizdi. Onda Ázerbaıjanmen saýda-ekonomıkalyq yntymaqtastyqty nyǵaıtý – mańyzdy mindet ekeni aıtyldy.