Qos baǵa: Saýda mınıstrligi satyp alý men bólip tóleýdiń aıyrmashylyǵyn túsindirdi

ASTANA. KAZINFORM – Bıyl kúzden bastap elimizde taýarlarǵa eki túrli baǵa qoıý júıesi engizilip jatyr. Onyń máni nede?

Tikeleı satyp alý men bólep tóleýdiń aıyrmashylyǵyn Saýda jáne ıntegratsııa mınıstrligi tutynýshylardyń quqyǵyn qorǵaý komıteti memlekettik saıasatty qalyptastyrý basqarmasynyń basshysy Erkebulan Taǵashev túsindirdi.

- Eger taýardyń quny bólip tóleýsiz kórsetilse, biraq, satýshy bank arqyly qosymsha komıssııamen nemese paıyzben rásimdeýdi usynsa, bul satýshynyń óz tarapynan aıtqan usynysy bolyp esepteledi. Satýshy sizge osyndaı bank sharttary baryn aıtyp jetkizip otyr. Siz QR arqyly tólegen kezde, tólemdi tikeleı satýshyǵa jasamaısyz, ıaǵnı bólip tóleýdi rásimdeısiz, biraq ony satýshymen emes, bankpen jasaısyz, - dep túsindirdi Erkebulan Taǵashev ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, satýshy klıentke taýar qunyn bank arqyly bólip tóleý múmkindigi baryn aıtyp, usyna ǵana alady.

- Eger klıentke qosymsha tólem sharttary týraly satyp alý júzege aspas buryn aıtylsa, ol zańdy. Al bólip tóleýde satýshy taýar baǵasyn ózdiginen kótergen jaǵdaıda, zań buzýshy bolyp sanalady. Eger satýshy sizge usyndy, siz oǵan óz erkińizben kelisseńiz, odan arǵy másele bankpen baılanysty, - deıdi ol.

Buǵan deıin aýyl turǵyndarynyń tutynýshylyq quqyǵy qalaı qorǵalyp jatqany týraly qozǵaǵan edik. 

Sondaı-aq Saýda jáne ıntegratsııa mınıstrliginiń ókili «Taýardyń jarnamadaǵy baǵasy men dúkendegi baǵasy arasynda aıyrmashylyq bolsa, ne isteý kerek?» degen saýalǵa jaýap berdi. 

Aıta keteıik, jyl basynan beri 2,2 mlrd teńgege tutynýshylardyń quqyǵy qorǵaldy.