Qos azamattyǵy bar Túrkııa turǵynyna 600 myń teńge aıyppul salyndy

NUR-SULTAN.QazAqparat – Qazaqstannyń kólik polıtseıleri qos azamattyǵy bar Túrkııa azamatyna 600 myń teńgege jýyq aıyppul saldy, dep habarlaıdy QazAqparat Kóliktegi polıtsııa departamentiniń baspasóz qyzmetine silteme jasap.

Jedel-aldyn alý is-sharasyn ótkizý barysynda Almaty qalasynyń áýejaıyndaǵy Jelilik polıtsııa bóliminiń qyzmetkerleri Qazaqstan Respýblıkasynyń azamattyq týraly zańnamasyn buzǵan Túrkııa azamatshasyn anyqtap, ustady.

Tekserý barysynda kólik polıtseıleri «Stambýl-Almaty» baǵytyndaǵy áýe reısimen ushyp kelgen Qazaqstan men Túrkııanyń azamattyǵy bar 32 jastaǵy áıeldi ákimshilik jaýapqa tartty.

Oǵan qatysty QR ÁQBtK-niń 496-babynyń 2-bóligimen, ıaǵnı Qazaqstan Respýblıkasynyń zańnamasynda belgilengen merzimde shetel azamattyǵyn alý faktisin habarlamaý boıynsha ákimshilik hattama toltyryldy.

«Almaty qalasynyń mamandandyrylǵan aýdanaralyq ákimshilik sotynyń sheshimimen Túrkııa azamatyna 200 AEK mólsherinde (583 400 teńge) aıyppul túrindegi ákimshilik jaza taǵaıyndaldy»,-delingen habarlamada.

Eske sala keteıik, bıylǵy jyldyń basynan beri Kóliktegi Polıtsııa departamentiniń qyzmet kórsetý aýmaǵynda QR Halyqtyń kóshi-qony salasyndaǵy zańnamasyn buzǵan 124 azamat ákimshilik jaýapqa tartyldy, onyń ishinde 6 azamat qos azamattyǵy bar tulǵalar (Reseı-3, Túrkııa-2, AQSh-1).

Sondaı-aq, sot qaýlylarymen 26 sheteldik azamat elden tysqary shyǵarylyp, olardyń barlyǵyna 5 jylǵa deıin elge kirýge tyıym salyndy.