Qos azamattyǵy bar erli-zaıypty reseılikter elden shyǵaryldy

ALMATY. QazAqparat - Almaty qalasy áýejaıyndaǵy Jelilik polıtsııa bólimi Kóshi-qon bólimshesiniń qyzmetkerleri Qazaqstan Respýblıkasynyń azamattyq týraly zańnamasyn buzǵandary úshin Reseı Federatsııasynyń 69 jáne 71 jastaǵy azamattaryn ákimshilik jaýapqa tartty.

Bul týraly Kóliktegi polıtsııa departamenti bastyǵynyń birinshi orynbasary Madııar Aıtýǵanov aıtty.

Erli-zaıyptyǵa qatysty QR ÁQBtK 496-babynyń 2-bóligimen, ıaǵnı Qazaqstan Respýblıkasynyń zańnamasynda belgilengen merzimde shetel azamattyǵyn alý faktisin habarlamaý boıynsha ákimshilik materıaldar toltyryldy.

«Almaty qalasynyń ákimshilik quqyqbuzýshylyqtar jónindegi mamandandyrylǵan aýdanaralyq sotynyń qaýlysymen sheteldikterge 5 jyl merzimge QR aýmaǵyna kirýge tyıym salynyp, Qazaqstan Respýblıkasynan tys jerge shyǵaryp jiberý túrinde jaýapqa tartyldy», - dedi polıtsııa polkovnıgi.

Esterińizge sala keteıik, bıylǵy jyldyń basynan beri kólik polıtseıleri Qazaqstan Respýblıkasynyń kóshi-qon salasyndaǵy zańnamasyn buzǵany úshin barlyǵy 986 azamatty, onyń ishinde qos azamattyǵy bar 38 azamatty ákimshilik jaýapqa tartqan.

Sondaı-aq, sot qaýlysymen 155 sheteldik elden tys shyǵaryldy.