Qos azamattyǵy bar er adam Qazaqstannan shyǵaryldy
ASTANA. QazAqparat - Astana qalasynyń kóshi-qon polıtsııasy qos azamattyǵy bar er adamdy anyqtady. Sot úkimimen ony Qazaqstannan shyǵaryp jiberdi, dep habarlaıdy QazAqparat tilshisi.
Sot materıaldary boıynsha D. esimdi azamat 2012 jyly Germanııa azamattyǵyn alǵan bolatyn. Alaıda sheteldiń tólqujatyn alǵany jaıynda quziretti memlekettik organdarǵa habar bermedi. QR Ákimshilik quqyq buzýshylyq týraly kodeksiniń 2-baby, 496-tarmaǵyna sáıkes, Qazaqstan azamaty ózge eldiń azamattyǵyn alsa, 30 kúnniń ishinde tıisti memlekettik organdarǵa habarlaýy tıis. Al D. esimdi er adam bes jyldan astam ýaqyt boıy qos azamattyqpen júrgen.
«Atalǵan quqyqbuzýshylyq úshin D. ákimshilik jaýapkershilikke tartyldy. Sýdıa ony Qazaqstan Respýblıkasynan shyǵaryp jiberý jóninde sheshim qabylady. Sot úkimi kúshine endi», - delingen Astana qalalyq sottyń resmı habarlamasynda.
