Qos azamattyǵy bar áıel Qazaqstannan da, Reseıden de zeınetaqy alyp kelgen
ShQO polıtsııa departamenti baspasóz qyzmetiniń málimetine súıensek, tártip saqshylary qos azamattyǵy bar áıeldi anyqtady. Ol bir jylǵa jýyq ýaqyt boıy Qazaqstannan jáne Reseıden zeınetaqy alǵan.
«Altaı aýdanynyń polıtseıleri aýdan ákimdigimen salystyryp tekserý júrgizý kezinde atalǵan faktini anyqtady. 2021 jyly Altaı qalasynyń 74 jastaǵy turǵyny RF Krasnoıarsk ólkesi boıynsha shet memlekettiń azamattyǵyn alǵan. Alaıda bul týraly ishki ister organdaryna nemese Qazaqstan Respýblıkasynyń tıisti mekemelerine habarlamaǵan. Osylaısha eki elden de zeınetaqy tólemderin alyp otyrdy», - delingen aqparatta.
Qazaqstandyq qujattardy paıdalanǵany úshin shetel azamatyn Altaı aýdanynyń soty QR ÁQBtK-niń 496-baby 2-bóligimen 200 AEK somasynda aıyppul salý túrindegi ákimshilik jaýapkershilikke tartty. Qazirgi ýaqytta qujattary alynyp, QR azamattyǵynan aıyryldy.
Aıta keteıik, ShQO-da jyl basynan beri azamattyq týraly zańnamany buzǵany úshin 75 adam jaýapqa tartylǵan.