Qos azamattyq úshin jazany qatańdatýǵa qarsy emespiz — QR ІІM

ASTANA. KAZINFORM – QR Іshki ister mınıstriniń orynbasary Igor Lepeha qos azamattyq úshin jaýapkershilikti kúsheıtý týraly usynysqa pikir bildirdi.

Úkimet otyrysynan keıin ótken brıfıngte jýrnalıster Májilis depýtattarynyń qos azamattyq úshin jaýapkershilikti qatańdatý týraly usynystary jóninde suraq qoıdy jáne ІІM ókiliniń pikirin surady. 

– Eger qos azamattyq anyqtalsa, eń qatal jaza – Qazaqstan Respýblıkasynyń azamattyǵynan aıyrý. Onsyz da munyń ózi qatań jaza. Degenmen, biz depýtattarmen bul máselelerdi talqylaımyz jáne usynystar bolsa, olardy qarastyrýǵa daıynbyz. Jalpy alǵanda, jazany qatańdatýǵa qarsy emespiz, – dedi Igor Lepeha.

Eske sala ketsek, Pavlodar oblysynda qos azamattyqqa qatysty myńnan astam derek anyqtaldy.

Abaı oblysynda jyl basynan beri qos azamattyq úshin 15 adam jaýapqa tartyldy.