Qos aıaǵynan aıyrylǵan qyz balany ońaltý sharalaryn moınymyzǵa alamyz — mınıstr

ASTANA. KAZINFORM – Elordada jol apaty saldarynan eki aıaǵynan aıyrylǵan qyz balany ońaltý sharasyn tolyǵymen Eńbek jáne halyqty áleýmettik qorǵaý mınıstrligi jaýapkershiligine alady. Bul týraly vedomstvo basshysy Svetlana Jaqypova málim etti. 

— Protezdeý boıynsha barlyq qyzmetti, sondaı-aq ońaltý sharasyn óz moınymyzǵa alamyz. Keshe buqaralyq aqparat quraldarynda da aqparat jarııalandy, ıaǵnı qyz bala Egindikól aýdandyq emhanasynda tirkelgen. Qazir dárigerler tarapynan jeke ońaltý baǵdarlamasy ázirlenip jatyr. Otbasy bizdiń qaraýymyzda, — degen túsinik berdi Svetlana Jaqypova Májiliste BAQ ókilderiniń saýalyna jaýap bere turyp.

Keshe Astanada jol apatynan eki aıaǵynan aıyrylǵan qyz bala aýrýhanadan shyqty. 

Eske salaıyq, Astanada avtobýs júrgizýshisi rólge ıe bola almaı, jol jıegindegi baǵanǵa soqtyǵysqany anyqtaldy. 

Jol apatynan bir zardap shegýshiniń jaǵdaıy aýyr ekeni, ota jasalatyny aıtyldy.  Keıin zardap shekken 1 jolaýshynyń aıaǵyna ampýtatsııa jasalǵany belgili boldy.