Qorjyndaryń medalǵa tolsyn - chempıondar olımpıadashylarǵa sáttilik tiledi
Jaqsylyq Úshkempirov, Máskeý Olımpıadasynyń chempıony:
- Árıne, Jazǵy Olımpıadadaǵy jeńimpazdar men Qysqy Olımpıadadaǵy júldegerlerdi áste salystyrýǵa bolmaıdy. Biraq, ekeýi de eldiń abyroıyn asyratyn, baıraǵymyzdy jelbiretetin, Ánuranymyzdy áýeletetin doda. Sondyqtan, Olımpıadany qysqy, jazǵy dep bólýge bolmaıdy. Ekeýi de elimiz úshin mańyzdy. Biz Olımpıada ardageri bolǵandyqtan barlyǵyna birdeı tilekshimiz. Phenchhanǵa bara jatqan sportshylarǵa myna bizdiń, ıaǵnı jazǵy olımpıadashylardyń jolyn bersin. Eń bastysy, eldiń abyroıy, mereıimiz tasysyn. Barlyǵyna aq jol tileımin. Sáttilik joldas bolsyn...
Baqtııar Artaev, Afına Olımpıadasynyń chempıony:
- Qaı sport túrin alsaq ta, qazaq elinde eń bastysy sporttyq dástúr, tamyry tereń mektep bar. Qysqy Olımpıada oıyndarynda Vladımır Smırnov salǵan sara jol bar. Sondyqtan, qazaq elinde jazǵy sport túrleri ǵana damyǵan, qysqy sport múlde qalyp qoıǵan degen jańsaq pikirden aýlaq bolýymyz kerek shyǵar. Qazirgi tańda qysqy sport túrleri de jaqsy damyp keledi. Qyzyǵatyn jastar da kóp. Sol úshin aldaǵy Qysqy Olımpıadada sportshylarymyzdan, ıaǵnı áriptesterimizden úlken úmit kútemiz. Olarǵa tileıtinim tek sáttilik. Tabysty óner kórsetip, elge aman esen jetsin degim keledi.
Nurbaqyt Teńizbaev, Beıjiń Olımpıadasynyń kúmis júldegeri:
- Jalpy Olımpıada oıyndary qysqy bolsyn, jazǵy bolsyn - alǵa qoıǵan maqsaty bir. Sol sporttaǵy myqtyny anyqtaý, elder arasyndaǵy yntymaqtastyqty arttyrý jáne sportty nasıhattaý.
Qazir Qazaqstan quramasy Ońtúsitk Koreıada ótetin qysqy Olımpıada oıyndaryna attanyp ketti. Óz kezegimde barsha sportshylarǵa sáttilik tileımin. Sportshynyń óz ónerin kórsetetin eń joǵarǵy jarys dep Olıpıada oıyndaryn aıtar edim. Komandamyz osy qysqy Olımpıadadan júldeli kelip, jankúıerlerin qýantsa eken deımin. Olımpıadalyq sport túrleriniń basqa sport túrlerine qaraǵanda, daıyndyq barysy, jarysqa daıyndalýy jáne ol Olımpıadaǵa joldamany utyp alýy - úlken eńbekpen keletin jetistik. Sondyqtan qysqy oıyndarda óner kórsetetin sportshylardyń daıyndyǵy, qazirgi qobaljýyn jaqsy túsinemin. Óz atymnan qysqy Olımpıada oıyndaryna qatystatyn sportshylarǵa jetistik tilep, elimizdiń kók týyn jelbiretedi degen senimdemin.
Bolat Jumadilov, Olımpıada oıyndarynyń eki dúrkin kúmis júldegeri:
- Olımpıada oıyndary dese, júregimiz alyp ushyp, baıaǵy ózimiz synǵa túsken sátter kóz aldymyzǵa elestep ketedi. Olımpıada - sporttyń tóresi. Sondyqtan Koreıaǵa bara jatqan sportshylarymyzǵa tek sáttilik tileımin. Qorjyndary medalǵa tolsyn. Elimizdiń baıraǵyn bıikten jelbiretsin. Abyroıymyzdy asyryp, mereıimizdi kótersin. Jazǵy olımpıadashylardyń jetistigi olarǵa da juǵysty bolsyn degim keledi. Olar týymyzdy jelbiretip baryp, jelbiretip oralsyn. Biz olar elge oralǵanda bórkimizdi aspanǵa atyp, áýejaıdan saltanatty túrde qarsy alatyn kún bolsyn...
