Qoryqtan 126 ondatr aýlaǵan Balqash turǵyny ustaldy

ASTANA. QazAqparat - Іle-Balqash rezervatynda 126 ondatrdy zańsyz aýlaǵan brakoner ustaldy. Bul týraly QR Aýyl sharýashylyǵy mınıstrligi Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet málimdedi, dep habarlaıdy QazAqparat.

«2019 jyldyń 26 qańtarynda Іle-Balqash memlekettik tabıǵı rezervatynyń ınspektorlary júrgizgen reıdtik sharalar barysynda zańsyz ondatr aýlaǵan Almaty oblysy Balqash aýdanynyń turǵynyn ustady», - dep jazdy ol Feısbýktegi paraqshasynda.

Ustalǵan turǵynnyń «ÝAZ» markaly kóligin teksergende, 126 óli ondatr tabyldy.

«Barlyq qujattar men materıaldar Balqash aýdanynyń polıtsııa bólimine joldandy. Kúdiktige qatysty sotqa deıingi tergeý jumystary júrgizilip jatyr», - dedi S. Dildahmet.