Qoryqshylarǵa qaýip tóndirgender 20 jylǵa deıin sottalýy múmkin

NUR-SULTAN. QazAqparat – Kıik múıizimen aınalysqandar 5 jylǵa deıin bas bostandyǵynan aıyrylady. Bul týraly Parlament Májilisiniń jalpy otyrysynda qylmystyq-protsestik zańnamany jetildirý máselelerin talqylaý barysynda QR Bas prokýrorynyń orynbasary Marat Ahmetjanov málim etti, dep habarlaıdy QazAqparat tilshisi.

«Ókinishke qaraı, kıikti zańsyz aýlaý áli de jalǵasyn tabýda. Sondyqtan zańsyz kıik múıizimen aınalysqany úshin jeke quram qarastyrylyp otyrmyz. Jazasy qatal, 5 jylǵa deıin bas bostandyǵynan aıyrý kózdelgen. Aıyppul bolmaıdy. Sebebin túsindirip keteıik. Bul túzetýdiń mánisi joǵary rýhanı tárbıelik astary bar desem de bolady. Keı jerde aq bóken deımiz, kıik, halqymyzdyń kıeli sanaıtyn janýary. Keń dalada baıaǵy zamannan erkin ósken, onyń tirshiligi aıasy da bizdiń dala. Osynda qys qystap, jaz jaılaıdy, kóktemde quralaı óredi. Qazir naqty tosqaýyl qoıatyn kez keldi. Áıtpese, kıikten múldem aıyrylyp qalý qaýipi bar», - dedi M. Ahmetjanov.

Onyń sózine qaraǵanda, tabıǵatymyzdy, ań qustarymyzdy qorǵaıtyn ınspektordy jáne qoryqshynyń ómirine qaýip tóndirip, kúsh qoldanǵany úshin jaýapkershilik engizý qarastyrylǵan. Osyndaı qylmystar úshin jıyrma jylǵa deıin bas bostandyǵynan aıyrý bolady.

Aıta keteıik, búgin jalpy otyrysta palata depýtattary «Qazaqstan Respýblıkasynyń keıbir zańnamalyq aktilerine qylmystyq jáne qylmystyq-protsestik zańnamany jetildirý máseleleri boıynsha ózgerister men tolyqtyrýlar engizý týraly» zań jobasy talqylanyp jatyr. Osy oraıda urlyqqa qatysty áreketter aýyr qylmystar sanatyna kóshetini málim boldy.

Budan buryn habarlanǵandaı, janýarlar álemine qarsy qylmystarǵa jaza kúsheıtiledi.