Qoryqshy Ádil Kenjeǵulov «Aıbyn» ordenimen marapattaldy
NUR-SULTAN. QazAqparat – QR Prezıdenti Qasym-Jomart Toqaevtyń jarlyǵymen Ádil Kenjeǵulov ІІІ dárejeli «Aıbyn» ordenimen marapattaldy, dep habarlaıdy QazAqparat Aqordaǵa silteme jasap.
«Qyzmettik boryshyn atqarý ústinde kórsetken erligi men janqııarlyǵy úshin Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń «Ohotzooprom» ÓB» RMQK Qyzylorda óńirlik fılıalynyń ınspektory Ádil Sharapatdınuly Kenjeǵulov ІІІ dárejeli «Aıbyn» ordenimen nagradtalsyn (marqum)», -delingen Jarlyq mátininde.
Osy Jarlyq qol qoıylǵan kúninen bastap qoldanysqa engiziledi.
Bul oqıǵa Qyzylorda oblysynyń Jalaǵash aýdanynda 25 qazan kúni túnde bolǵan edi. Qashqan brakonerdiń sońyna túsken ınspektordyń kóligi aýdarylyp ketken. Brakonerler oqıǵa ornynda ustaldy. Olardyń kóliginen qarý men zańsyz atylǵan jabaıy ańnyń ushasy tabyldy
Aıta keteıik, Ádil Kenjeǵulov - jyl basynan beri tabıǵatty qorǵaýda mert bolǵan úshinshi qoryqshy.
Foto: emer.gov.kz
