Kórý qabileti buzylǵan balalardy oqýlyqpen qamtýǵa 879 mln teńge bólinedi

— 2026–2028 jyldarǵa arnalǵan respýblıkalyq bıýdjette kórý qabileti buzylǵan balalardy ádisnamalyq qamtamasyz etýge 879 mln teńge (2026 j. — 284 mln, 2027 j. — 305 mln, 2028 j. — 288 mln). Qarastyrylǵan. Qazirgi tańda 34 oqýlyq (16 — Braıl, 18 — úlkeıtilgen) bekitý satysynda, 39 oqýlyq (17 — Braıl, 22 — úlkeıtilgen) saraptamada, al 36 oqýlyq (18 — Braıl, 18 — úlkeıtilgen) ázirlený ústinde. 2027–2029 jyldary bul baǵytqa 1 mlrd teńge bólinip, kórý qabileti buzylǵan balalar úshin 109 oqýlyq (56 — Braıl, 53 — úlkeıtilgen) ázirleý josparlanǵan. Oqýlyqtarmen qamtamasyz etý jergilikti atqarýshy organdar esebinen júzege asyrylady. Osylaısha, oqýlyqtar men oqý-ádistemelik keshenderdi ázirleý jumystary kezeń-kezeńimen júrgizilip jatyr, — dedi Úkimet basshysy.

Onyń atap ótýinshe, mektepke deıingi, orta jáne arnaıy bilim berý uıymdaryn jabdyqtarmen, jıhazben, sondaı-aq oqý quraldarymen jáne dıdaktıkalyq materıaldarmen qamtamasyz etý talaptary bekitilgen. 2025 jyly jergilikti atqarýshy organdar 193 arnaıy bilim berý uıymynyń materıaldyq-tehnıkalyq bazasyn (1 mlrd teńge — jabdyqtar men jıhaz, 2,6 mlrd teńge — jóndeý jumystary) 3 mlrd teńgeden astam somaǵa jańartty.

— 2026 jyly bul baǵytqa 7,8 mlrd teńge (1 mlrd teńge — jabdyqtar men jıhaz, 6,8 mlrd teńge — jóndeý jáne qurylys) qarastyrylyp otyr. 2026 jylǵy sáýirdegi Úkimet otyrysynda Oqý-aǵartý mınıstrligine jergilikti atqarýshy organdarmen birlesip, 2026 jylǵy 1 qyrkúıekke deıin ınklıýzıvti bilim berýdiń jańa modelin engizý, oqý-ádistemelik qamtamasyz etý jáne materıaldyq-tehnıkalyq bazany kúsheıtý jóninde tapsyrmalar berildi. Jalpy oqý-ádistemelik qamtamasyz etý men materıaldyq-tehnıkalyq bazany nyǵaıtý jumystary jalǵasýda, — dedi Oljas Bektenov.

Buǵan deıin oqyrman nazaryna balanyń kórý qabileti nasharlamaýy úshin ne isteý kerektigine qatysty maman keńesin usynǵan edik.