Kórý qabileti nashar saılaýshylarǵa jaǵdaı jasalady – OSK
«Saıası partııa ókilderiniń qatysýymen múgedektigi bar jandardyń quqyǵyn qamtamasyz etý boıynsha birlesken sharalar qabyldandy. Biz saıası partııalarǵa múgedektigi bar kandıdattardy máslıhattarǵa tartý múmkindigin qarastyrý týraly tapsyrma berdik. Májiliste múgedektigi bar kandıdattardy saılaýǵa túsýiniń talaby men normasy bar. Máslıhattarda mundaı talap joq. Osy oraıda biz saıası partııalarǵa keńes berdik. Komıssııa músheleri atalǵan bastamany biraýyzdan qoldap daýys berdi», - dedi Anastasııa Şegortsova OSK otyrysynda.
Sondaı-aq OSK ókiliniń aıtýynsha, úgit-nasıhat sharasy kezinde múgedektigi bar azamattardyń quqyǵyn qamtamasyz etý jaǵy usynyldy.
«Barlyq partııa usynymdardy eskerip, máslıhat tizimderine múgedektigi bar adamdardy engizdi. Saılaý ýchaskelerinde múgedektigi bar jandarǵa jaǵdaı jasaý boıynsha óńirlerdi tyńdadyq, jergilikti atqarýshy organdardyń múgedektigi bar jandarǵa jaǵdaı jasaý servısteri boıynsha keń aqparattyq túsindirý jumysyn júrgizýine nazar aýdardyq», - deıdi ol.
Onyń málimetinshe, úshinshi usynys kórý qabileti nashar saılaýshylarǵa arnalǵan trafaretter jasaýǵa qatysty boldy.
«Barlyq óńirdegi saılaý ýchaskelerinde Braıl shrıfti bar trafaretter, sondaı-aq kandıdattar tizbesi bar bıýlletenderdiń aýdıo nusqalary qoljetimdi bolady. Májiliske bir mandatty okrýgter boıynsha túsetin kandıdattar tizbesi uzaq. Biraq, biz jasaǵan bıýlletendi sarapshylar oqýǵa qıyn dep sheshti. Osy oraıda zaǵıptar qoǵamyna júgindik, olar bizge máseleni oń sheshýde kómektesti. Abaı, Aqtóbe, Atyraý, Mańǵystaý, Pavlodar, Ulytaý jáne Shyǵys Qazaqstan oblystarynda Braıl shrıftimen trafaretter jasaý týraly sheshim qabyldandy. Al aýdıo nusqasy bar trafaret barlyq óńirde bolady», - dedi A. Şegortsova.
