Kortqa qaıta oralǵan 40 jastaǵy Galına Voskoboeva bastapqy jeńisine qol jetkizdi

ASTANA. KAZINFORM — Qazaqstandyq tennısshi, 40 jastaǵy Galına Voskoboeva juptyq synda Monreal (Kanada) WTA 1000 týrnıriniń ekinshi aınalymyna joldama aldy.

G.Voskoboeva tórt jyldyq úzilisten keıin ótken aıda reseılik Kamılla Rahımovamen birge Vashıngton WTA 500 jarysynda baq synap, onda alǵashqy aınalymda amerıkalyqtar Sofıa Kenın — Kerolaın Doýlhaıdqa 5:7, 3:6 esebimen ese jibergen edi.

Bul joly K.Rahımovamen birge Monrealda bastapqy kezdesýin norvegııalyq Ýlrıkke Eıkerı — japonııalyq Erı Hodzýmımen ótkizdi.

Qazaqstandyq-reseılik jup 6:2, 6:4 esebimen basym tústi.

Bir saǵat 21 mınýtqa sozylǵan básekede Voskoboeva — Rahımova 2 eıspen birge 8 breık-poınttyń beseýin paıdalandy. Qarsylastary 1 eıs, 2 breıkten (8 breık-poınt) asa almady.
Galına Voskoboeva — Kamılla Rahımova shırek fınalǵa shyǵý úshin amerıkalyqtar S. Kenın — K.Doýlhaıdpen talasady.

Eske sala keteıik, Galına Voskoboevanyń tennıske qaıta oralǵanyn jazǵan bolatynbyz.