Kórshim balkonynda shylym shegedi, al onyń ıisi bizdiń páterge deıin keledi — jaýapkershilik qarastyrylmaǵan
AQTÓBE. KAZINFORM — Elimizde páter ishinde, balkonda temeki shegýge tyıym salynbaǵan. Al onyń tuqylyn laqtyrsa, ákimshilik jaýapqa tartylady.
QR zańnamalarynda páter ishinde, balkonda, lodjııada temeki shegýge tyıym salynbaǵan. Sáıkesinshe onyń tútini, ıisi kórshińizdiń páterine kirip, jaısyzdyq týdyrsa da dáleldeý qıynǵa túsedi.
— Balkonda temeki shegý men temeki tuqylyn syrtqa laqtyrý — eki bólek másele. Balkonda turyp temeki shegýge arnaıy tyıym salynbaǵan. Bul quqyq buzý bolyp sanalmaıdy. Alaıda temeki tuqylyn balkonnan, lodjııadan nemese terezeden syrtqa laqtyrýǵa tyıym salynady. Bul órt qaýipsizdigi talaptaryn buzyp, basqa adamdardyń ómiri men múlkine qaýip tóndirýi múmkin. QR Ákimshilik quqyq buzýshylyq týraly kodeksiniń 410-baby boıynsha órt qaýipsizdigi talaptaryn buzǵany úshin ákimshilik jaýapkershilikti qarastyrylǵan. Naqty qandaı jaza qoldanylatyny quqyq buzýdyń mán-jaıyna jáne zańnyń tıisti normasyna baılanysty anyqtalady. Jeke tulǵalarǵa alǵashqy kezde eskertý jasalyp, quqyq buzý qaıtalanǵan jaǵdaıda 20 AEK mólsherinde aıyppul salynady, — dedi Aqtóbe oblystyq TJD baspasóz qyzmeti.
Kópqabatty turǵyn úıde kórshiler arasyndaǵy daý-damaý, quqyq buzý «Turǵyn úı qatynastary týraly» zańy aıasynda da retteledi. Biraq bul zańda da shylym ıisine qatysty ashyq aıtylmaǵan.
— «Turǵyn úı qatynastary týraly» zańyń 36-babyna sáıkes páterdiń menshik ıesi sanıtarııalyq, ekologııalyq jáne ózge de talaptardy saqtaýǵa mindetti. Alaıda temeki tutyný talaptarynyń saqtalýyn baqylaý jáne ákimshilik shara qoldaný turǵyn úı ınspektsııasynyń quzyretine jatpaıdy. Bul másele boıynsha Jergilikti polıtsııa qyzmetine júginý usynylady, — dep habarlady Aqtóbe qalalyq turǵyn úı ınspektsııasy.
Aqtóbe oblystyq PD baspasóz qyzmetiniń habarlaýynsha, Ákimshilik quqyq buzýshylyq týraly kodekstiń 441-baby sáıkes kópqabatty úılerdiń ortaq keńestigi, onyń ishinde kireberiste, podezde shylym shegýge bolmaıdy. Sondaı-aq QR «Halyq densaýlyǵy jáne densaýlyq saqtaý júıesi týraly» Zańynda da úılerdiń kireberisi tyıym salynǵan aýmaqqa jatady. Al epıdemıologtar bolsa mundaı suraq quzyretine kirmeıtinin aıtty.
Buǵan deıin habarlaǵanymyzdaı, álemde 1,7 mln-ǵa jýyq adam «eriksiz shylym shegýdiń» qurbany boldy. Bul keleńsiz jaıttyń zardabyn tartqandardyń tórtten birinen astamy — qorǵansyz balalar. 2023 jyly olardyń sany shamamen 767 mln adamǵa jetken.
